रोला छन्द श्री गजानंद पात्रे

रोला छन्द श्री गजानंद पात्रे
(1)
मिलके आघू बढ़व,करव पूरा सब सपना।
सुघ्घर गढ़व सुराज,कोन दूसर सब अपना।।
सुनलौ आज गुहार,चीख करथे महतारी।
बिसरत संस्कृति आज,याद कर पात्रे पारी।।

(2)
कोठी कोठी धान,खुशी होवय जी भारी।
चहके खेती खार,संग लइका महतारी।।
राहर तिवरा मूंग,हवय खेती के बेरा ।
आगे हमर तिहार,माघ पूस छेरछेरा।।

(3)
जिनगी बइला जान,हवे गाड़ा ये काया।
जीयत भरके साथ,फेर बिरथा हे माया।।
आघू बाढ़य हाथ,सुखी जीवन के ओरा।
चिंता छोड़व माथ,थाम उन्नति के डोरा।।

रचनाकार - गजानन्द पात्रे
छत्तीसगढ़