Followers

Friday, April 20, 2018

भुजंग प्रयात छंद - श्री जीतेंद्र वर्मा "खैरझिटिया"

मदारी -

मदारी  धरे बाँसुरी ला बजावै।
सुनै गाँव वाले सबो दौड़ आवै।
खड़े आदमी हे बना गोल घेरा।
जमूरा  मदारी  लगाये ग फेरा।

हवै बेंदरा  नेवला  साँप  भालू।
करे काम दौड़े जमूरा ग चालू।
बने  नाच  के बेंदरा हा दिखावै।
बजे ताल भालू नरी ला झुलावै।

कहाँ गा पटे नेवला साँप तारी।
लड़ाई  करावै  ग देखौ मदारी।
बजै  ढोल  बाजा लड़े खूब दोनो।
कहाँ साँस ले आदमी देख कोनो।

जमूरा ह हाँसी ठिठोली करे गा।
सबे हाथ ले खूब ताली झरे गा।
जियाँ हा अघाये सबे आदमी के।
उना पेट  ताये  ग  जंजाल जी के।

करे  खेल गाँवे गली मा मदारी।
कभू मान पाये कभू खाय गारी।
चले खेल ले रोज दाना ग पानी।
हरे  खेल  देखौ ग ये जिंदगानी।

जमाना नवा हे नवा खेल छाये।
कहाँ  गा  मदारी जमूरा सुहाये।
गँवागे  मदारी  गँवागे जमूरा।
धरे हाथ मा फोन घूमे ग टूरा।

रचनाकार - श्री जीतेंद्र वर्मा "खैरझिटिया"
बाल्को(कोरबा)
9981441795

20 comments:

  1. बहुत बढ़िया रचना वर्मा जी ।आपके रचना ला पढके हमर गाँव मा मदारी आथे तेकरे सुरता आगे ।बिल्कुल सटीक रचना लिखे हो।
    बहुत बहुत बधाई ।

    ReplyDelete
  2. वाह बहुत बढ़िया भईया जी बधाई हो

    ReplyDelete
  3. परम् पूज्य गुरुदेव संग आप सबो ल अन्तस् ले नमन

    ReplyDelete
  4. मदारी उपर बहुत बढ़िया रचना हे जितेन्द्र जी ।

    ReplyDelete
  5. वाहःहः भाई जुन्ना मनोरंजन के साधन ला जीवंत करे हव।
    अइसने रचना आने वाले पीढ़ी के लिए उत्सुकता के विषय रहही।
    बहुत बहुत बधाई।

    ReplyDelete
  6. क्या बात है।जबरदस्त रचना वर्माजी । बधाई।

    ReplyDelete
  7. मन मोहन तुम भूल गये हो, आज सुनाओ मुरली तान
    वृंदावन की कुंज गली में, गोप - गोपियों की मुस्कान।

    ReplyDelete
  8. वाह्ह्ह् बहुत खूब भइया जी

    ReplyDelete
  9. लाजवाब भुजंग प्रयात।

    ReplyDelete
  10. भुजंग प्रयात छंद मा शानदार चित्रण,भैया ।बधाई अउ शुभकामना।

    ReplyDelete
  11. आप सबके दया मया पाके मन गदगद होगे, परम पूज्य गुरुदेव के श्री चरण म माथ नवावत आप सबो ल सादर नमन

    ReplyDelete