छप्पय छंद---चोवा राम 'बादल'

छप्पय छंद---चोवा राम 'बादल'

       1  जिनगानी

करबे झन  अभिमान , चार दिन के जिनगानी।
 चारे दिन के आय , चकाचक रूप जवानी।
 धन दौलत पद मान, तोर ए कुटुम कबीला।
 माया बँधना आय , पाँव मा गड़थे खीला ।
 नइ उतरत लागय देर जी, नदिया के पूरा चढ़े।
 फट ले जाथे गा फूट ए,  माटी के काया गढ़े ।

         2 पुन्नी रात

   सुग्घर  पुन्नी रात, चँदैनी हावय छटके।
 चातक के मन आज, हवय चंदा मा अटके।
  टपकत अमरित बूंद, शीत मा  जगत नहाये।
   बरसा गे हे भाग ,शरद जब ले हे आये।
 सुरता आथे बात वो ,द्वापर युग के रास के।
 राधा मोहन के मिलन, जमुना निधिवन खास के।

     3   दसेरा

  मन के रावण मार, दसेरा चलौ मनाबो।
 दस ठन भरे विकार, सबो ला जोर जलाबो ।
  अहंकार अउ क्रोध ,हवय गा बड़का बैरी।
  इरखा माया मोह , मताथें रोज्जे गैरी।
  परब हमर ए दशहरा, होही तब फुरमान जी।
 परमपिता प्रभु राम हा, देही बड़ वरदान जी ।

    4  प्लास्टिक छोड़

 घातक प्लास्टिक छोड़, धरौ कपड़ा के झोला ।
 झिल्ली भरे समान, रोग ले आथे चोला।
 पशु जब एला खाय ,पेट फूले मर जाथे ।
बंजर होथे  खेत, जाम नाली बस्साथे।
  बउरे मा नुकसान हे,  झिल्ली बड़ शैतान हे ।
 अबड़ कीमती जान हे , धोखा  मा इंसान हे ।


      5   सीमेंट बन जा

 बन जा तैं सीमेंट ,जोड़ दे ईंटा पखरा।
 बन के भारी बीर, चाल झन फोकट अखरा ।
 सब ले नाता टोर, परे अलगे रइ जाबे ।
 देख मया ला बाँट, मया उपराहा पाबे।
 नव के रुखुवा केंवची, सहि जाथे तूफान ला।
 होना चाही गा नरम , ओइसने इंसान ला ।

      6  उपदेश

 झाड़े बर उपदेश, काम काला नइ आही।
खुद अपना के देख ,फायदा तभे बताही ।
 दिखही सूरत आन, मुखौटा कहूँ लगाये।
 ढोंगी बन के संत,अबड देथे भरमाये।
 धरम करम के बात जे, करत रथे दिन रात जी।
 पढ़ के वेद पुरान ला, हवय सिरिफ समझात जी।


चोवा राम 'बादल '
हथबन्द, छत्तीसगढ़