सार छंद गीत-श्रीमती आशा आजाद

सार छंद गीत-श्रीमती आशा आजाद

समता हिरदे बस जाये जी,भाईचारा लावौ।
समरसता के भाव रहै जी,उजियारा बगरावौ।।

मनखे मनखे एक रहय जी,गुनलौ सुग्घर बानी।
गुरुघासीदास बबा हा जी,अबड़ राहीन ज्ञानी।
छूआछूत ला दूर भगाके,सबझन मन दमकावौ।
समता जग मा बगरावौ जी,भाईचारा लावौ।।

बाबा अम्बेडकर ह बोलिन,जात पात ला भूलौ।
सुग्घर जम्मो काज करौ जी,मन ले मन ला छूलौ।
मनुज रक्त हा एक हवे जी,मानवता अपनावौ।
समता जग मा बगरावौ जी,भाईचारा लावौ।।

गाँधी जी के नेक वचन ला,सबझन सुग्घर मानौ।
झूठ लबारी गोठ त्याग के,नेक करम पहिचानौ।
भेदभाव ला तोड़ौं जम्मो,झरखा द्वेष मिटावौ।
समता जग मा बगरावौ जी,भाईचारा लावौ।।

इँदिरा गाँधी ज्ञान देत हे,नारी साहस धरलौ।
अनाचार ले जुरमिल लड़हूँ,तन लोहा कस रखलौ।
शिक्षा के अनमोल रतन ले,जन जन मा फैलावौ।
समता जग मा बगरावौ जी,भाईचारा लावौ।।

झाँसी के रानी के हिम्मत,सबला ये सिखलाथे।
मुसकिल होवै कतको भारी,दुनियाँ ले लड़ जाथे।
अंतस हिरदे जोश जगाके,कमजोरी ल भगावौ।
समता जग मा बगरावौ जी,भाईचारा लावौ।।

छंदकार-श्रीमती आशा आजाद
पता-मानिकपुर, कोरबा छत्तीसगढ़