आगे नवा बिहनिया अब गा, झन जीयव दबके।
बैर-भाव ला पाछू छोड़व, सबझन मजहब के।
झन बोवव ककरो बर काँटा, फेंकव सब खनके।
कोनो ला झन काटव संगी,कैची कस बनके।।
नेक करम के मान अबड़ हे, नोहय गा ससता।
जग मा नाम अमर हो जाही, गढ़बे जब रसता।
कभू गरब झन करबे भाई, इहाँ अपन बल के।
झन सोचव जादा जिनगी मा, का होही कल के।।
सबो सँवारव अपन आज ला, कल सुग्घर बनही।
उहू आज बनके जब आही, कोन समय गनही।।
जगदीश "हीरा" साहू
कड़ार (भाटापारा), छत्तीसगढ़
