छन्द खजाना : छन्द के छ के स्थापना दिवस के सादर बधाई के साथ अक्ती तिहार विशेष विशेष छंदबद्ध कविता..

अक्ती तिहार विशेष छंदबद्ध कविता..

जीतेन्द्र वर्मा खैरझिटिया: हरिगीतिका छंद-अक्ती

मिलजुल मनाबों चल चली अक्ती अँजोरी पाख में।

करसा सजा दीया जला तिथि तीज के बैसाख में।।

खेती किसानी के नवा बच्छर हरे अक्ती परब।

छाहुर बँधाये बर चले मिल गाँव भर तज के गरब।।

ठाकुरदिया में सब जुरे दोना म धरके धान ला।

सब देंवता धामी मना बइगा बढ़ावय मान ला।।

खेती किसानी के उँहे बूता सबे बइगा करे।

फल देय देवी देंवता अन धन किसानी ले भरे।।

जाँगर खपाये के कसम खाये कमइयाँ मन जुरे।

खुशहाल राहय देश हा धन धान सुख सबला पुरे।।

मुहतुर किसानी के करे सब पाल खातू खेत में।

चीला चढ़ावय बीज बोवय फूल फूलय बेत में।।

ये दिन लिये अवतार हे भगवान परसू राम हा।

द्वापर खतम होइस हवै कलयुग बनिस धर धाम हा।

श्री हरि कथा काटे व्यथा सुमिरण करे ले सब मिले।

धन धान बाढ़े दान में दुख में घलो मन नइ हिले।

सब काज बर घर राज बर ये दिन रथे मंगल घड़ी।

बाजा बजे भाँवर परे ये दिन झरे सुख के झड़ी।।

जाये महीना चैत आये झाँझ झोला के समय।

मउहा झरे अमली झरे आमा चखे बर मन लमय।

करसी घरोघर लाय सब ठंडा रही पानी कही।

जुड़ चीज मन ला भाय बड़ शरबत मही मट्ठा दही।

ककड़ी कलिंदर काट के खाये म आये बड़ मजा।

जुड़ नीम बर के छाँव भाये,घाम हे सब बर सजा।

लइकन जुरे पुतरा धरे पुतरी बिहाये बर चले।

नाँचे गजब हाँसे गजब मन में मया ममता पले।

अक्ती जगावै प्रीत ला सब गाँव गलियन घर शहर।

पर प्रीत बाँटे छोड़के उगलत हवै मनखे जहर।।

जीतेन्द्र वर्मा"खैरझिटिया"

बाल्को,कोरबा(छग)

9981441795

💐💐💐💐💐💐💐💐💐💐💐

अकती के बिहाव*

चौपाई छन्द - बोधन राम निषाद राज

अकती के बेरा हा आगे।

मनखे मन मा खुशियाँ छागे।।

जुरमिल मड़वा सब गड़ियाही।

पुतरी पुतरा बिहा रचाही।।

दूनों सँग मा भाँवर होही।

जनम-जनम के बनही जोही।।

अँगना मा मड़वा गड़ियाबो।

आमा डारा ओमा छाबो।।

गहूँ पिसानी चउँक पुराबो।

करसा पोरा बने सजाबो।।

कँडरा घर के पर्रा बिजना।

छिंदी पाना मउँरे फुँदना।।

डूमर के मँगरोहन बनही।

तील तेल सँग हरदी चढ़ही।।

बइला गाड़ी जाय बराती ।

पुतरा के सँग जाय घराती।।

बड़े बिहनिया समधी पाबो।

पुतरी गौना घलो कराबो।।

जम्मों सँगवारी हा आही।

खुशी-खुशी सब जेवन खाही।।

बारा महिना मा ये आथे।

गंगा जइसे सबो नहाथे।।

हँसी खुशी मा जाथे डेरा।

बड़े मजा मा बीते बेरा।।

रचनाकार:-

बोधन राम निषादराज "विनायक'

सहसपुर लोहारा,कबीरधाम (छ.ग.)

💐💐💐💐💐💐💐💐💐💐💐💐

: अकती परब के महत्व - दोहा छंद

~~~~~~~~~~~~~~~~~~~~~

(1)

माँ गंगा के अवतरण,इहि भुइयाँ मा आज।

महातपी भागीरथी,करिन पुण्य के काज।।

(2)

परशुरामा अवतरण,जप तप करिन अनेक।

जलत रहिन बड़ क्रोध मा,हरि गुण गाइन नेक।।

(3)

मातु अन्नपूर्णा घलो, होय अवतरण आज।

सबो चराचर जीव ला,अन्न दिए अउ राज।।

(4)

चीरहरण माँ द्रोपती,होइस इहि दिन काल।

हरिहर श्री भगवान हा,ओला लिन संभाल।।

(5)

कृष्ण सुदामा बन सखा,होइस इक संजोग।

अमर प्रेम गुणगान के,आइस हे दिन योग।

(6)

धन के देव कुबेर ला,मिलिस खजाना आज।

अधिपति राजा स्वर्ग बन,करिन अचल वो राज।।

(7)

सतयुग त्रेतायुग बनिस,इहि दिन ले संसार।

ब्रम्ह पुत्र के अवतरण,अक्षय वीर कुमार।।

(8)

सुग्घर बद्रीनाथ के, नारायण शुभ धाम।

खुलथे मंदिर द्वार हा,इहि दिन ले अविराम।।

(9)

वृंदावन के धाम मा, कृष्ण बिहारी लाल।

दर्शन श्री विग्रह चरण, इहि दिन केवल साल।

(10)

अंत महाभारत घलो, कौरव पांडव युद्ध।

शांत चित्त मनखे सबो,मिटिस ह्रदय के क्रुद्ध।।

(11)

खेत किसानी काम ला,करथे शुरू किसान।

इहि दिन नाँगर जोतथे,पाँच मुठा ले धान।।

(12)

सुग्घर सिद्ध मुहूर्त हे,अकती तीज तिहार।

गौरी लाल गणेश सब,हरथे विघ्न अपार।।

~~~~~~~~~~~~~~~~~~~~~

रचनाकार:-

बोधन राम निषादराज "विनायक"

सहसपुर लोहारा,जिला-कबीरधाम (छ.ग.)

💐💐💐💐💐💐💐💐💐💐💐💐

आगे अक्ती (सरसी गीत)

-------------------------------

आगे अक्ती अब तो देखत, लगगे नावा साल।