लावणी छंद- जीतेन्द्र वर्मा"खैरझिटिया"
रिकिम रिकिम के रुख राई
रंग रंग के रुखवा रहिथे, डहर खार बारी बन मा।
हवा दवा फर फूल छाँव दे, बरकत लाथे जीवन मा।
कोसम कसही काजू करही, कलमीं कुर्रु अउ कर्रा।
कैल कदम्ब करंज कुसुम सँग, कोइलार कैथा हर्रा।
कारी काँके कया करौदा, पोनी परसा अउ पीपर।
सेम्हर साजा सिरसा सीसम, गस्ती गूलर गुलमोहर।
सरई सँग सइगोन सेनहा, शामिल वन संसाधन मा।
हवा दवा फर फूल छाँव दे, बरकत लाथे जीवन मा।
चार चिरौंजी चंदन चिल्हुट, चीड़ ताड़ तेंदू दहिमन।
बेल बहेड़ा बोइर बम्हरी, बर बीजा बाँस बकायन।
रियाँ रोहिना रीठा सेहुड़, धोबिन धामन अउ धौंरा।
आबनूस अंजीर अटर्रा, अमलतास आमा औंरा।
नीम नारियल नींबू जामुन, मुनगा ठाढ़े आँगन मा।
हवा दवा फर फूल छाँव दे, बरकत लाथे जीवन मा।
खैर खजूर खम्हार खेजड़ा, हींग छींद फन्नास फरद।
नीलगिरी नीगुर निवरंगी, देवदार फलसा फरहद।
महोगनी मंदार मोदगा, मकोइया मूढ़ी मउहा।
दुधी तून शहतूत सतावर, महालीम गुंदा कउहा।
आल अशोक अचार अरूनी, नाचत रहिथे कानन मा।
हवा दवा फर फूल छाँव दे, बरकत लाथे जीवन मा।
पांगर पिलू पडौक पाडरी, रेउन्जा रोली रोहन।
सलई सिरिस सिवान सुपारी, सिस्सू सेजा अउ झिंगन।
अमली असन आमटा अमरुद, गलगल गिन्दोल गमारी।
रोली रबड़ बदाम टोडरी, गिलची करधई गरारी।
भरे रथे जंगल झाड़ी हा, चिचवा चीकू अंजन मा।
हवा दवा फर फूल छाँव दे, बरकत लाथे जीवन मा।
ककई कैम कपूर कोरिया, पुला पापड़ा मधुकामन।
कुंभी कल्ला केकड़ काटुल, बिलसेना बोदल तिलवन।
भिरा भेलवा भिरहा भिलमा, बरना बेलारी पाडर।
मीठालीम महारुख मोखा, जमरासी खिरनी पाकर।
हल्दू धनबोहार मैनफल, सब आथे काम विघन मा।
हवा दवा फर फूल छाँव दे, बरकत लाथे जीवन मा।
चकुर चिकोल डिकामाली सँग,बोहार लसोटा तिनसा।
खरक संतरा मुसर निर्मली, छाल दालचीनी फलसा।
रंग रंग के रुख राई हे, बड़ मुश्किल हे लिख पाना।
लासा कोसा लकड़ी पानी, देथे फुलवा फर दाना।
कटे फोकटे झन रुख राई, ठानव सबझन ये मन मा।
हवा दवा फर फूल छाँव दे, बरकत लाथे जीवन मा।
जीतेंद्र वर्मा"खैरझिटिया"
बाल्को,कोरबा(छग)
लगभग 171 छोटे बड़े रुख राई
No comments:
Post a Comment