छन्द खजाना

मजदूर अउ बासी दिवस विशेष-छंदबद्ध सृजन

नारायण वर्मा बेमेतरा: *छंद कुंडलियाँ-बासी*

रथिया बाँचे भात ला,पानी संग मिलाय।

करके चानी गोंदली,माईपिल्ला खायँ।।

माईपिल्ला खायँ,नहा धो करै मुखारी।

होगे कहूँ अथान,मजा तब आथे भारी।।

पेट रहे दलगीर,ससन भर पीयव पसिया।

राखै देह निरोग, बिहनिया मँझनी रथिया।।01।।

खावौ बासी तान के,सुरपुट सैंया रोज।

ना चुटकी भर नून ला,साग पान झन खोज।।

साग पान झन खोज,आजकल बड़ महँगाई।

हे गरीब पकवान, मान तैं आय मिठाई।।

राँध एक घँव भात,मजा दू बेर उड़ावौ।

ईंधन घलो बचाव,तात अउ ठंडा खावौ।।02।।

बाढ़े भाव अनाज के,होय नहीं बरबाद।

अड़बड़ होथे पुष्टई,सेहत संग सुवाद।।

सेहत संग सुवाद,ताकथे दिन भर हड़िया।

खनिज तत्व भरपूर, देह ला राखे बढ़िया।।

गरमी नही जनाय,भागथे लू हर ठाढ़े।

काटै सबो बियाद, कब्ज हर जेखर बाढ़े।।03।।

छत्तीसगढ़ी शान हे,आय कलेवा जान।

राखै सदा जवान तन,बासी गुन के खान।।

बासी गुन के खान,खवैया खुश हो जाथे।

जानै जेन सुवाद,परोसा ले ले खाथे।।

बाढ़े आँखी जोत,खाय बासी संग कढ़ी।

रचे बसे मन प्राण, मयारू छत्तीसगढ़ी।।04।।

बासी खा पुरखा हमर,करिन सदा दिन काज।

परम्परा फैशन बने, लोगन मन बर आज।।

लोगन मन बर आज,लेत हें सेल्फी भारी।

छाये फोटूबाज,दिखावा हरै बिमारी।।

बात कोन पतियाय,केउ झन खाय तियासी।

*चंदन* बिना बताय,खात हे कतको बासी।।05।।

नारायण प्रसाद वर्मा *चंदन*

ढ़ाबा-भिंभौरी, बेमेतरा (छ.ग.)

7354958844

💐💐💐💐💐💐💐

ज्ञानू मजदूर

भूख प्यास मजदूर, करथे बूता रातदिन।

जीये बर मजबूर, तंगहाल मा देखलौ।।

स्वारथ मा हे लोग, कोन समझथे दुख इँखर।

लगे हवै का रोग, चूसत दुनिया खून हे।।

सपना लगे अँजोर, अँधियारी घपटे हवै।

नवा सुरुज सुख भोर, कब उगही जिनगी इँखर ।।

सिर मा नइये छाँव, हाल बुरा मजदूर के।

उँखरा हावय पाँव, कपड़ा तन मा हे कहाँ।।

काम इँमन चुपचाप, भूख प्यास रहिथे करत।

जिनगी ले संताप, कइसे होही दूर अब।।

ज्ञानु

💐💐💐💐💐💐💐💐

*त्रिभंगी छंद - मजदूर*

हो हलाकान ये,दे परान ये,अपने दम मा,काम करै।

भोजन पाये बर,सुख लाये बर,जिनगी दुख के,नाम करै।।

दुनिया सिरजइया,इही कमइया,गाँव शहर मा,शोर हवै।

करथे मजदूरी,हो मजबूरी,महिनत इँखरे,जोर हवै।।

रचना-

बोधन राम निषादराज

💐💐💐💐💐💐💐

ज्ञानू : बासी

का गुण गावँव बासी के

टॉनिक हमर थकासी के

दूर करै ताप बदन के

दुश्मन आय उँघासी के

बीपी सुगर करै कंट्रोल

का मालिक का दासी के

हम गरीब के भोजन ए

रोये के नइ हाँसी के

दर्शन एमा हो जाथे

मथुरा, काबा, काशी के

चटनी बासी खाऔ रोज

नाम जपौ अविनाशी के

मान हमर पहिचान हमर

छत्तीसगढ़ के वासी के

ज्ञानु

💐💐💐💐💐💐💐💐

राज निषाद: *छप्पय छंद-बासी*

खावौ बासी रोज, दूर होही बिमारी।

पोषक हे प्रोटीन, देत हे ताकत भारी।।

बोरे बासी आज, पेट भर तँय हा खा ले।

आमा चटनी संग, स्वाद जी मन भर पा ले।।

नून बने जी डार के, दही संग मा खाव गा।

लान गोंदली चान के, सुग्घर मजा उड़ाव गा।।

*राज*

💐💐💐💐💐💐💐💐

विजेन्द्र: मजदूर दिवस पर दुर्मिल सवैया।

मजदूर

सरदी गरमी बरसात रहै,सबके अउ काम उही करथे।

नद नाल सरोवर बाँध बना,सबके दुख पीर उही हरथे।

मजदूर कहावय गा जग मा,श्रम के बलिदान करे मरथे।

निरमान करे नव भारत के,तब पेट घलो उकरे जरथे।

कतका बलवान हवै भइया,सबके अउ बोझ उठाय चले।

अबड़े उपकार करे उन हा,जिनगी अँधियार बिताय चले।

सुविधा सुख ले अउ दूर रहै,पर के सुख ला सिरजाय चले।

मरहा जरहा कचरू बुधिया,जकला अउ नाँव धराय चले।

खुद के दुख हा खुद ला दिखथे,पर के दुख ला अब कोन सुने।

पहिरे फटहा चिथरा कुरता, इकरे कुरता अब कोन तुने।

अउ घाव दिखे कतका गहरा,पर पीर कहाँ अब कोन गुने।

दुख सौंप इहाँ तँय हा प्रभु ला,तकलीफ उहीच निमार फुने।

विजेंद्र कुमार वर्मा

नगरगाँव (धरसीवाँ)

💐💐💐💐💐💐💐💐💐💐💐

बासी दिवस अउ मजदूर दिवस के सादर बधाई

बासी खावै रोज के, दँदर दँदर ते रोय।

फोटू खिंचवा एक दिन, खरतरिहा हे होय।।

गीत--बासी बासी बासी के हल्ला

साग दार कमती पड़ जाथे, पुरे न राशन राशि।