आल्हा छंद
कारगिल विजय दिवस
बलिदानी बेटा भारत के, हरव देश के तू मन शान।
भारत माँ के रक्षा खातिर, अपन लुटाए हावव प्रान।।
हवय देश के आन बान हा, नेव धरे तुम्हरे बलिदान।
करजा कभू चुका नइ पावन, होही तुम्हर सदा गुनगान।।
माटी ला महतारी माने, माटी बर तज देथव प्रान।
अमर रहू भारत के बेटा, सदा तुम्हर होही जयगान।।
दूध पिलाइस हे बघवा ला, करिस हवय जेहर प्रतिपाल।
नमन हवय अइसे दाई ला, जेखर तुमन हवव जी लाल।।
आज हमन तुम्हरे किरपा ले, देखत हन जी ये संसार।
भारत माँ के वीर सिपाही, नमन हवय जी बारंबार।।
छंद साधक सत्र 11
अनिल सलाम
उरैया (नयापारा)
तहसील - नरहरपुर
जिला - कांकेर (छत्तीसगढ़)
🙏🙏
No comments:
Post a Comment