मतदान जागरुकता विशेष
मीता अग्रवाल: कुण्ड़लिया छंद
मतदाता बड़का हवे, लोकतंत्र के नींव।
जिम्मेदारी हे बड़े, अंतस जागय जीव।
अंतस जागय जीव, सबों बर चुनई छुट्टी।
पावन बड़ त्यौहार,परब के पीवव घुट्टी।
गुनव मधुर के बात, ददा-दाई अस नाता।
लोकतंत्र दे मान,वोट दे हर मतदाता।।
रचनाकार-
डॉ मीता अग्रवाल मधुर रायपुर छग
💐💐💐💐💐💐💐💐
मतदान जागरूकता पर दोहा छंद
सबो काम ला छोड़ के, दे बर जाहू वोट।
कखरो भपका मा इहाँ, लेहू झन गा नोट।।
लोभ लुभावन ले बचव, मन मा रख ईमान।
झूठ लबारी मारथे, तेकर कर पहचान।।
जनता के सेवक चुनव, जेहर लगे सुजान।
इही समझ के आज तो, करहू गा मतदान।।
एक वोट हे कीमती, होय जीत अउ हार।
सावचेत हो जाव जी, मिले हवय अधिकार।।
लोकतंत्र जिंदा रहय, बने भली सरकार।
मत की कीमत जान लो,करके सोच विचार।।
विजेंद्र वर्मा
नगरगाँव (धरसीवाँ)
💐💐💐💐💐💐💐💐💐💐💐💐
मनहरण घनाक्षरी
मतदान अधिकार, हमर हरे गा मान,
आहे चुनाव चलव,मतदान ड़ार दौ।
नेता बने छाँट लेहू,तभे तुम वोट देहू,
लबरा छटकाहा ला,तीर कोती टार दौ।
नेता जन सेवक हो, गरीब के साथी होय,
संग मिल चलैया हो,उही ला बिचार दौ।
झन कहूँ भेट लव,साड़ी दारू फेंक दव,
समझदार जानहू ,तेला पतवार दौ
🌺
दौड़ -दौड़ अभी आही,जीत के मुहूँ लुकाही।
धोखा झन देवे वोहा, बने पहिचान गा।
क्षेत्र के विकास करे,दुख पीरा आके हरे,
सुने बात सबके ला,देबो मतदान गा।
हमर अधिकार हे,मतदान करे बर,
चलो सब जुर मिल,अघुवा ला जान गा।
सुनता बँधा के चलो,दीदी भैया गा निकलो,
बने कस नेता रहे,चुनना हे ठान गा।
केवरा यदु"मीरा"राजिम
💐💐💐💐💐💐💐💐💐💐💐
दुर्मिल सवैया
112,112,112,112,
112,112,112,112
घट राम बसे जब गीत लिखौं,
सब भाव भरे मन मीत लिखौं।
नव छंद बने जब हास्य लिखौं,
जस पावन प्रीतम प्रीत लिखौं।।
पिय आवत ही दुख जावत हे
हिरदे अँगना जग जीत लिखौं।
जब अंतस भीतर सून नहीं
घर द्वार सजे अस रीत लिखौं।।
सुमित्रा शिशिर
💐💐💐💐💐💐💐💐💐💐💐
#मतदान-दिवस
जइसे रोज बिहान जरूरी
निर्मल जल इस्नान जरूरी
जीये बर जलपान जरूरी
वइसे हे मतदान जरूरी
बोले बिना बयान करे बर
मनमाफिक निर्मान करे बर
लोकतंत्र के मान करे बर
जाना हे मतदान करे बर
खेत गहूँ अउ धान जरूरी
हाट-बजार दुकान जरूरी
जइसे सब संस्थान जरूरी
वइसे हे मतदान जरूरी
काबर कखरो बात म आबो
मत देये बर खच्चित जाबो
अपन पसन के बटन दबाबो
मतदाता के फर्ज निभाबो
जइसे अक्षर ज्ञान जरूरी
कपड़ा मान मकान जरूरी
मनखे मुँह मुस्कान जरूरी
वइसे हे मतदान जरूरी
-सुखदेव सिंह "अहिलेश्वर"
💐💐💐💐💐💐💐💐💐💐💐
*मतदान महादान*
दान करौ शुभ महादान हे, करौ प्रथम मतदान।
लोकतंत्र के बनौ पहरुआ, करौ राष्ट्र उत्थान।।
संविधान हर देहे तुँहला,लाखो के अधिकार।
गढ़ौ भाग ला अपन हाथ मा,चुनव बने सरकार।।
सोन हरौ तुम नोहव कचरा, कीमत खुद के जान।।
दान करौ शुभ महादान हे.....
काम बुता ला छोड़ अभी कर,सबले बड़का काम।
भ्रष्टाचार बने हे बैरी,लगही तभे लगाम।।
एक वोट में काय बिगड़ही,सोंच कभू झन यार।
बूंद बूंद में भरे घड़ा हा,बने बूंद हा धार।।
लोकतंत्र के तिहार पावन,छोड़ अपन पहिचान।।
दान करौ शुभ महादान हे.....
जान मछरिया गरी फेंकही,झाँसा मा झन आव।
जेन करै जी भला देश के,ओखर करौ चुनाव।।
डार अपन मत निर्भय होके, लालच बिना दबाव।
अपन वोट के ताकत समझौ,आही तब बदलाव।।
तुँहर समस्या तुँहर तपस्या, होही सबो निदान।।
दान करौ शुभ महादान हे.....
लिहव दान के बदला मा कुछ,हरै जान लव पाप।
कौंड़ी मोल बिकत हव काबर,बन मूरख चुपचाप।।
कुकरा मछरी दारू लुगरा, कै दिन पुरही नोट।
अपन वोट ले चोट करौ चुप, मन मा जेखर खोट।।
भागीदारी अपन निभावव, बनही देश महान।।
दान करौ शुभ महादान हे.......
🙏🙏🙏🙏
नारायण प्रसाद वर्मा चंदन
ढ़ाबा-भिंभौरी, बेमेतरा(छ.ग.)
7354958844
💐💐💐💐💐💐💐💐💐💐
No comments:
Post a Comment