छन्द खजाना : आदिवासी विशेष छंदबद्ध सृजन

मैं रहवया जंगल के- आल्हा छन्द

झरथे झरना झरझर झरझर, पुरवाही मा नाचय पात।

हवै कटाकट डिही डोंगरी, कटथे जिंहा मोर दिन रात।।

डारा पाना काँदा कूसा, हरे मोर मेवा मिष्ठान।

जंगल झाड़ी ठिहा ठिकाना, लगथे मोला सरग समान।।

कोसा लासा मधुरस चाही, नइ चाही मोला धन सोन।

तेंदू मउहा चार चिरौंजी, संगी मोर साल सइगोन।।

मोर बाट ला रोक सके नइ, झरना झिरिया नदी पहाड़।

सुरुज लुकाथे बन नव जाथे, खड़े रथौं सब दिन मैं ठाड़।।

घर के बाहिर हाथी घूमय, बघवा भलवा बड़ गुर्राय।

चोंच उलाये चील सोचथे, लगे काखरो मोला हाय।।

छोट मोट दुख मा घबराके, जाय मोर नइ जिवरा काँप।

रोज भेंट होथे बघवा ले, कभू संग सुत जाथे साँप।।

काल देख के भागे दुरिहा, मोर हाथ के तीर कमान।

झुँझकुर झाड़ी ऊँच पहाड़ी, रथे रात दिन एक समान।।

रेंग सके नइ कोनो मनखे, उहाँ घलो मैं देथौं भाग।

आलस अउ जर डर जर जाथे, हवै मोर भीतर बड़ आग।।

बदन गठीला तन हे करिया, चढ़ जाथौं मैं झट ले झाड़।

सोन उपजाथौं महिनत करके, पथरा के छाती ला फाड़।।

घपटे हे अँधियारी घर मा, सुरुज घलो नइ आवय तीर।

देख मोर अइसन जिनगी ला, थरथर काँपे कतको वीर।।

शहर नगर के शोर शराबा, नइ जानौं मोटर अउ कार।

माटी ले जुड़ जिनगी जीथौं, जल जंगल के बन रखवार।।

आँधी पानी बघवा भलवा, देख डरौं नइ बिखहर साँप।

मोर जिया हा तभे काँपथे, जब होथे जंगल के नाँप।।

पथरा कस ठाहिल हे छाती, पुरवा पानी कस हे चाल।

मोर उजाड़ों झन घर बन ला, झन फेकव जंगल मा जाल।।

जीतेन्द्र वर्मा "खैरझिटिया"

बाल्को, कोरबा(छग)

💐💐💐💐💐💐💐💐💐💐💐💐💐

  दोहा

आदिवासी

सरल सहज मनखे लगै, जंगल के रखवार ।

सुघर आदिवासी मनन, बुढ़ा देव परिवार ।।

गोंड़ भील धुर्वा सबों,बैगा हल्बी जात।

मिलजुल के रहिथें सबों, दय नइ कोनों घात।।

आयुर्वेद भर-भर भरे, जंगल मा भंडार।

सबके वो रक्षक हवय, रोग हरय भरमार ।।

भरे खजाना अति अकन, सोन हीर के खान ।

दाई कोरा के मया, सुघर हवय संतान।।

जंगल हर भगवान हे, पहिरे तन मा छाल।

गावय कर्मा ददरिया, नाचत दय सब ताल।।

धनेश्वरी सोनी 'गुल'

बिलासपुर

💐💐💐💐💐💐💐💐💐💐💐

  अश्वनी कोसरे आदिवासी-वीर छंद

जंगल के हें अगुवा बेटा, मूलनिवासी हावय नाम|

रक्षा खातिर जल जमीन के, लगे रथैं गा आठोयाम||

जंगल के रखवारी करना, अव्वल मा हे जिनकर काम|

परबत डोंगर जंगल माढ़े, पुर अंचल घर माड़ा धाम||

बड़ महिनत जुझ करतब करके, जिनगी ला जीथें हर बार|

छिन छिन घड़ी घड़ी संकट हे, तभो बिताथें उमर पहार||

कंद फूल फर जर हे खाना, औषधि टोरा जिनगी सार|

जंगल के फर मउहा खाथें, तेंदू अमली बोइर चार||

पर हर फर बर मया बिकट हे, जिनगी भर रहिथे उपकार|

कहूँ एक फर खाना होही, तभो मनाही परब तिहार||

पहली सुमरन धरती के हे, उँकर कृपा ले हे उपहार|

सुरुज देव के बंदन करके, जल के जोरे हें अनुहार||

किसम किसम के परब मनाथे, हल्बी गोंडी सदरी कोल|

मुड़िया मड़िया मुण्डा भतरा, लेंजा खाथें रीलो बोल|

नाचँय सरहुल पूजा पतरा, सरई सरना माया दोल|

चैत परब हे पाट जातरा, पहिन बाइसन साजे ढोल||

दंडामी मुरिया मन साजैं, नाचँय झूम झूम ककसार|

सरना दइ के पूजा खातिर, सरहुल जस माटी संस्कार||

नवा फसल बर नवाखई हे , आमा बर आमखई तिहार|

बीजा पंडूम बीज बोनी, मन हरियर हे सबो जगार||

शिल्प कला लकड़ी कठवा के, इँकर हे सुग्घर पहिचान|

मेटल घड़वा पत्ता छिंदी, बाँस कला के हे बड़ ज्ञान||

अश्वनी कोसरे 'रहँगिया' कवर्धा कबीरधाम छ ग

💐💐💐💐💐💐💐💐💐💐💐💐💐

  अश्वनी कोसरे आदिवासी- वीर छंद

भैना भतरा उराँव जतरा, कुरुख कोरवा हावँय तेन|

बूढ़ा बड़ा देव हें मुड़का, पुरखा ठाना लिंगो पेन||

बावन गढ़ा गढ़निया राहय, गोंड राज के छतरप मान|

हाथी शेर सिहाँसन बइठे, बैगा भूम नाग परधान||

जोहर जोहर जय सेवा हे, सीधा सरल साफ हे बात|

मउरत फूल डार धर पाना, देवत हें रोजे सौगात||

महर महर हे डोंगर भुइँया, कहरत हे बन जंगल झाड़|

कलकल कलकल बहिथे नँदिया, झरना झरथे ऊँच पहाड़||

चिरई चुरुगुन हें संगवारी, बघवा भलुवा चौकीदार|

कछुआ मुसुवा टोटम टोंटी, बन संरक्षण बर तैयार||

अश्वनी कोसरे 'रहँगिया' कवर्धा कबीरधाम (छ. ग.)

  अश्वनी कोसरे गोटुल(घोटुल)- सरसी छंद

गोटुल हें बस्तर मा सुग्घर, मुरिया मन के शान|

गीत कहानी रीलो रेला, हुलकी पाटा मान||

गौर माड़िया ढोलक साजे, जग मा हे पहिचान|

टिमकी तुरही दमऊ दफड़ा, बाजय संग निशान||

शिक्षा के सब पढ़थें बानी, गोंड धरम संस्कार|

करम मान के बोली भाखा, जिनगी के बेवहार||

परंपरा निरबाह करे बर , सिरतों पावँय ज्ञान|

तप ले तो कमती नइ होवय, योग साधना ध्यान||

पुरखा पेन बिराजे सउँहत, सेवा जोहर गान|

चेलिक अउ मुटियारी मन के, जिनगी बर बरदान||

घर के साज सजावट सिखलँय, जानँय सग परिवार|

रहन-सहन अउ रीत - नीत के, बाढ़ँय गुन भरमार||

शिल्प कला अउ पाक कला के, पावँय घलो विधान|

फूल पान ले करँय सवाँगा, निखरय तन परिधान||

बेल जड़ी अउ औषध छानँय, करदँय काढ़ा दान|

रक्षा खातिर डोर बनावँय, सीखँय तीर कमान||

गुरूमाँय के सँग मा जावँय, मुटियारिन बन खार|

जंगल ले उन लावँय टोरा, तेंदू मउहा चार||

चेलिक मन सब धनुष बनावँय, काटँय छाटँय बाँस|

डोरी खींच चढ़ावँय अंचा, तान करँय अभ्यास||

बइठक होवय रतिहा जागँय, आंदोलन के काम|

क्रांतीकारी नवजवान मन, रोज करँय विश्राम||

गोटुल मा रणनीति बनै सब, आजादी के दौर|

देश बचाये खातिर होवँय, छइहाँ वाले ठौर||

घाम प्यास बर कमिया मनके, गोटुल हे गा धाम|

अब नइ हे वो ठाना ठीहा, आवय सबके काम||

अश्वनी कोसरे 'रहँगिया' कवर्धा कबीरधाम (छ.ग.)

💐💐💐💐💐💐💐💐💐💐💐💐💐

लावणी छन्द गीत - भारत के हम मूल निवासी (०४/०९/२०२५)

अपने जइसे मनखे समझव, नोहन कोनों दानव जी ।

भारत के हम मूल निवासी, हम ला तो पहिचानव जी ।।

नइ हे बड़का महल अटारी, जंगल भीतर रहिथन जी ।

सरदी गरमी जाड़ा भारी, दुख पीरा ला सहिथन जी ।।

रूखा सूखा भोजन करथन, पेट गुजारा जानव जी ।

भारत के हम मूल निवासी, हम ला तो पहिचानव जी ।।

जंगल के फर फूल सुहाथे, बोली चिरई चिरगुन के ।

कल-कल कल-कल नदिया करथे, मन भर जाथे धुन सुन के ।।

पाॅंच तत्व के पूजा करथन, बात सही हे मानव जी ।

भारत के हम मूल निवासी, हम ला तो पहिचानव जी ।।

झन काटव जंगल झाड़ी ला, एमा तो जिनगानी हे ।

संसाधन देथे जिनगी बर, बिन जंगल नुकसानी हे ।।

दुखिया मन के दुख मिट जावॅंय, अइसे मन मा ठानव जी ।

भारत के हम मूल निवासी, हम ला तो पहिचानव जी ।।

ओम प्रकाश पात्रे 'ओम '

ग्राम- बोरिया, जिला- बेमेतरा (छत्तीसगढ़)

💐💐💐💐💐💐💐💐💐💐💐💐💐

  डी पी लहरे सार छन्द गीत

विषय -आदिवासी

मूल निवासी हम भारत के, जंगल के रखवाला।

लोग आदिवासी कहिथें जी, कहिथें भोला-भाला।

इष्ट देवता हमर प्रकृति हे, करथन एखर पूजा।

बुढ़ा देव ले बड़का देवा, हमर कोंन हे दूजा।

जय सेवा जय सेवा संगी, मिलके जपथन माला।

मूल निवासी हम भारत के, जंगल के रखवाला।।

रेलो-रेलो करमा सरहुल, सुघ्घर नाचा-गाना।

गौर-माड़िया सैला गेंड़ी, सुख के हमर खजाना।।

बिरसा मुंडा के हम वंशज, झन परहू रे पाला।

मूल निवासी हम भारत के, जंगल के रखवाला।।

डी.पी.लहरे'मौज'

कवर्धा छत्तीसगढ़

💐💐💐💐💐💐💐💐💐💐💐💐💐

  कुकुभ छंद- आदिवासी

पिछड़े जाति आदिवासी हें, भारत के मूल निवासी।

तेंदू चार चिरौंजी खाथें, खाथें इन बोरे बासी।।

कोल भील अउ गोंड सहरिया, हो बिरहोर भिलाला।

हल्बा मुण्डा खड़िया बोडो, नायक भूमिज मतवाला।।

हे जनजाति उरांव पारधी, जारी हे जाति तलाशी।

पिछड़े जाति आदिवासी हें, भारत के मूल निवासी।।

प्रकृति उपासक कहिलाथें अउ, जल जंगल के रखवाला।

श्रम के बने पुजारी फिरथें, रहिथें इन भोला-भाला।।

तरसें सुख सुविधा के खातिर, कष्ट सहें हें चौमासी।

पिछड़े जाति आदिवासी हें, भारत के मूल निवासी।।

मुड़ी सजायें पागा कलगी, धोती कुरता पहिनावा।

धरथें तीर कमान हाथ मा, नइ जानें कपट छलावा।।

सुवा ददरिया करमा गा के, कर लेथें दूर उदासी।

पिछड़े जाति आदिवासी हें, भारत के मूल निवासी।।

पाँच तत्व के करथें पूजा, जीथें सुग्घर जिनगानी।

जिनगी के आधार धरा हे, आग हवा नभ अउ पानी।।

हृदय समाये बुढ़ादेव ला, घट-घट मा मथुरा कासी।

पिछड़े जाति आदिवासी हें, भारत के मूल निवासी।

इंजी. गजानंद पात्रे "सत्यबोध"

बिलासपुर (छत्तीसगढ़)

💐💐💐💐💐💐💐💐💐💐💐💐💐

  मुकेश जयकारी छंद-- आदिवासी आँव

जल जंगल के मँय रखवार।

रहिथौं गा जुरमिल परिवार।।

धरथौं मँय हा तीर कमान।

इही मोर हावय पहिचान।।

........जय गंगान

महिनत करथौं जाँगर टोर।

पथरा कस छाती हे मोर।।

सादा-पींयर गमछा बाँध।

चलथौं मँय हा जोरे खाँध।।

........जय गंगान

आदिम संस्कृति के बढ़वार।

करथौं सबले मया दुलार।।

कोदो कुटकी धान उगाँव।

पुरखा मन के गुन ला गाँव।।

.......जय गंगान

मउहा, तेंदू, लासा, चार।

इही मोर जिनगी आधार।।

जंगल झाड़ी हावय धाम।

करथौं मँय हा खेती काम।।

........जय गंगान

बाँधे रखथौं सुमता डोर।

जस दाई के अँचरा छोर।।

सुवा, ददरिया, करमा गीत।

इही मोर पुरखा के रीत।।

.......जय गंगान

पूत आदिवासी के आँव।

प्रकृति शक्ति ला माथ नवाँव।।

पागा कलगी हावय शान।

तुर्रा बाना मोर मितान।।

.......जय गंगान

मुकेश उइके "मयारू"

ग्राम- चेपा, पाली, कोरबा(छ.ग.)

💐💐💐💐💐💐💐💐💐💐💐💐💐

  मुकेश सरसी छंद गीत-- आदिवासी

पुरखा संस्कृति पागा कलगी, इही हमर पहिचान।