दोहा छन्द - श्री मोहनलाल वर्मा

दोहा छन्द - श्री मोहनलाल वर्मा

नखशिख सिंगार वर्णन

पावँय नारी के जनम,जेमन पुण्य कमाय।
दाई दीदी के सबो,सुग्घर नता निभाय ।।१।।

घटा सही चूँदी दिखय,घपटे करिया जान ।
छरिया देवय तब लगय,देवी चढ़े समान ।।२।।

नागिन कस बेनी दिखय,गजरा कर सिंगार ।
माँग लाल सेंदूर हे,टिकली लगे कपार ।।३।।

काजर आँखी आँज के,खिनवा पहिरय कान ।
नथनी फुल्ली नाक के,लेवत हवे परान।।४।।

खोपा मा हे मोंगरा,दौना पान लगाय ।
बुरी नजर नइ तो लगय,सुँदरी रूप कहाय ।।५।।

मुँहरंगी लग होंठ मा,भाग अपन सँहराय ।
तेलइ गोरी गाल के,चंदा देख लजाय ।।६।।

गर मा रुपिया ला पहिर,अउ नवलखिया हार ।
ऐंठी पहुँची हाथ मा,मुँदरी अँगरी डार ।।७।।

लगे हथेरी मेंहदी,सँहरावत हे भाग ।
दर्जन भर चूरी नरी,चिनहा हवय सुहाग ।।८।।

करधन कनिहा झूलके,करय गाँव भर शोर ।
टोंड़ा लच्छा गोड़ के,पैरी बाजय तोर ।।९।।

चाँदी बिछिया पाँव मा,माहुर हवे रचाय ।
पहिरय लुगरा पोलखा,इत्तर ले महकाय ।।१०।

रचनाकार - श्री मोहनलाल वर्मा
ग्राम -अल्दा, पोस्ट - तुलसी मानपुर,
तहसील - तिल्दा, जिला -रायपुर
छत्तीसगढ़