सार छंद- श्वनी कोसरे

 *सार छंद- श्वनी कोसरे

अमरइया मा डार झुमरगे, आमा टपकन लागे|

किसिम किसिम के चिरई चुरगुन, खायेबर जुरियागे||

फरगें लटलट ले बर पीपर,भुइँया तीपन लागे||

सोंध सोंध ममहावत डूमर, अमली बड़ गदरागे||

तीतर मैना सारस सुवना, खावत बइठें डारा|

बारोमासी पेंड़ पुरोथें, पंछी मनबर चारा||

फूलधरे हें मउहा पिंवरा, बड़े बिहिनिया झरथें|

घर बन खुश हो झउँहा झउँआ, सोना बिनबिन धरथें||

 गरमी मा दरमी हा फुलथे, कैत बेल मन फरथें|

गंगाइमली कोकी कोकी, चुक लाली हो झरथें||

तेंदू चार चिरौंजी टोरा, मन ला खींचन लागे|

जाम पेंड़ मा फरही जामुन, मुँह मा पानी आगे||

परसा के लाली फुलवा हर, मन ला सबके हरथे|

तेंदू पाना हरियर हरियर, खीसा सबके भरथे||

पेंड़ हवय जब तक भुइँया मा, पुरवइ ला हे बहना|

पानी चाही पेड़ बचावन, ए धरती के गहना|

देखन कैसे रूप सॕवारे, बन हर  मोहय मन ला|

हरियर लागत हवय कलिंदर, धरके लाली तन ला||

छंद साधक-

अश्वनी कोसरे 

 रहँगिया

कवर्धा कबीरधाम