सुधरे सेलिब्रेटी मन- लावणी छंद
गलत चीज ला जौन बढ़ाये, तज दव अइसन हस्ती ला।
अपन सुवारथ बर उन मन हा, फूँक दिही घर बस्ती ला।
कोई बेचे दारू घुटका, ता समान कोई घटिया।
ये सब कर उन पइसा जोड़े, हमर जाय बिक घर टठिया।
लाज आय नइ बड़े बने हे, दिखे डुबोवत कस्ती ला।
गलत चीज ला जौन बढ़ाये, तज दव अइसन हस्ती ला।
जुआ चिती मा घर बन उजड़े, तभो करे विज्ञापन ला।
पइसा कौड़ी के लालच मा, बेच डरिस हें तन मन ला।
भले भाड़ मा जाये जनता, नइ छोड़े उन मस्ती ला।
गलत चीज ला जौन बढ़ाये, तज दव अइसन हस्ती ला।
नंगापन अउ गलत नियत लत, लोगन के बीच परोसे।
अइसन मन ला बड़े बनाके, कोन फालतू मा पोसे।।
पथरा ला पारस ए कहिके, महँगा कर दिस सस्ती ला।
गलत चीज ला जौन बढ़ाये, तज दव अइसन हस्ती ला।
जीतेन्द्र वर्मा"खैरझिटिया"
बाल्को,कोरबा(छग)
सेलिब्रेटियों द्वारा कुछ भी विज्ञापन किया जा रहा है, जो कि सही नही है।
No comments:
Post a Comment