आषाढ़ मा उगे लमेरा-रोला छ्न्द
आये जब आषाढ़, रझारझ बरसे पानी।
झाँके पीकी फोड़, लमेरा आनी बानी।
किसम किसम के काँद, नार बन बिरवा जागे।
नजर जिंहाँ तक जाय, धरा बस धानी लागे।
बम्हरी बगई बेल, बेंमची अउ बोदेला।
बच बगनखा बकूल, बोदिला बदउर बेला।
बन तुलसी बोहार, जिमीकाँदा अउ जीरा।
खदर खैर खरबूज, खेड़हा कुमढ़ा खीरा।
काँसी कुसुम कनेर, कुकुरमुत्ता करमत्ता।
कँदई अउ केवाँछ, भेंगरा फुलही पत्ता।
कुँदरू कुलथी काँस, करेला काँदा कूसा।
कर्रा कैथ करंज, करौंदा करिया रूसा।
सन चिरचिरा चिचोल, चरोटा अउ चुनचुनिया।
लटकन लीम लवांग, लजोनी लिमऊ लुनिया।
गूमी गुरतुर लीम, गोड़िला गाँजा मुनगा।
गुखरू गुठलू जाम, गोमती गोंदा झुनगा।
दवना दुग्धी दूब, मेमरी अउ मोकैया।
धतुरा धन बोहार, बजंत्री बाँस चिरैया।
साँवा शिव बम्भूर, सेवती सोंप सिंघाड़ा।
आदा अंडी आम , आँवला अउ गोंटारा।
माछी मुड़ी मजीठ, मुँगेसा मूँग मछरिया।
कउहा कँउवा काँद, केकती अउ केसरिया।
बन रमकलिया छींद, कोलिहापुरी कलिंदर।
रक्सी रंगनबेल, खेकसी पोनी पसहर।
भसकटिया दसमूर, पदीना पोई पठवन।
गुलखैरा गुड़मार, सेनहा साजा दसवन।
गुड़सुखडी गिन्दोल, गोकर्णी गँउहा गुड़हर।
फरहद फरसा फूट, फोटका परसा फुड़हर।
देवधूप खम्हार, मोखला अरमपपाई।
उरदानी फन्नास, सारवा अउ कोचाई।
गुढ़रू चिनिया बेर, सन्दरेली सिलियारी।
उरईबूटा भाँट, खोटनी रखिया ज्वाँरी।
हँफली हरदी चेंच, डँवर धनधनी अमारी।
बाँदा बर बरियार, मेंहदी बाँकसियारी।
चिरपोटी चनसूर, कोदिला कोपट कसही।
रागी रामदतोन, कोचिला केनी कटही।
बिच्छीसुल शहतूत, कोरई अउ कोलीयारी।
लिली सुदर्शन फर्न, सबे ला भावै भारी।
लिख पावौं सब नाम,मोर बस में नइ भैया।
बरसा घड़ी अघाय, धरा सँग ताल तलैया।
जीतेन्द्र वर्मा"खैरझिटिया"
बाल्को, कोरबा(छग)
No comments:
Post a Comment