आल्हा छंद- इंजी.गजानंद पात्रे "सत्यबोध"

आल्हा छंद- इंजी.गजानंद पात्रे "सत्यबोध"

कोरोना-
याद जमाना जुग जुग रखही, कोरोना के नरसंहार ।
मन्दिर मस्जिद बन्द रहिस हे, बन्द चर्च गरुद्वारा द्वार ।।

वो भगवान कहाँ छुपगे जब, रहिस देश  मा संकट घोर ।
अंधभक्त मन दूर लुकागे, कोरोना जब  मारिस जोर ।।

राहत बर बस हाथ बढ़ाये, देखव परखव तुम विज्ञान ।
इही बात ला मँय तो सोंचव, होथे का सच मा भगवान ।।

नाम बड़े कब जग मा होथे, होथे बड़का सच मा काम ।
करम करे से सउँहत मिलथे, राम रहीम यीशु गुरु धाम ।।

मोर लेखनी के हे कहना, बनव सबो जी करम प्रधान ।
करम करे तब पेट भरे हे, भरय नहीं कोई भगवान ।।

ना तो मँय हा धर्म विरोधी, ना मँय नास्तिक सुन भगवान ।
सच्चाई ला धर मँय जीथँव, मोर इही असली पहिचान ।।

छंदकार - इंजी.गजानंद पात्रे "सत्यबोध"
बिलासपुर ( छत्तीसगढ़ )