जैविक खातू
जैविक खेती ला अपनावव, तभे जीव के हे कल्याण।
जहर परोसत ये रासायन, होवत सब के मरे बिहान।।
लालच मा उत्पादन खातिर, अनदेखा झन करव मितान।
बढ़त रोग हर आनी बानी, जान बूझ झन बनव नदान।।
डी.ए.पी.युरिया ले बाढ़े, टी.बी केंसर जइसन रोग।
बी.पी.शुगर कुपोषण घातक, अलप काल मा मरथें लोग।।
किडनी लीवर नुकसान करत हे, करत हवा पानी बरबाद।
अगला पीढ़ी ला का दे हव, सोचव बने तभे मरजाद।।
होत जात हे माटी बंजर, लागत भारी बाढ़त जाय।
करत हानि हे जीव जंतु ला, पर्यावरण घलो मइलाय।।
जैविक खातु संग माटी अउ, फसल घलो मा होय सुधार।
कम लागत मा गुण जादा हे, दिन दिन बाढ़त पैदावार।।
आमदनी हर बाढ़य जादा, वातावरण बनय खुशहाल।
शुद्ध हवा अउ भोजन पानी, कटय बिमारी के जंजाल।।
🙏🙏🙏🙏
नारायण प्रसाद वर्मा *चंदन*
ढ़ाबा-भिंभौरी, बेरला(बेमेतरा)
7354958844
बहुत सुन्दर सर जी
ReplyDelete