टोक्यो ओलम्पिक -चोवाराम वर्मा"बादल"
💐💐💐💐💐💐💐
मेडल आगे मेडल आगे, जग मा नीरज छागे।
नील गगन मा धजा तिरंगा, फहर फहर फहरागे।।
झूमत हावयँ खुशी मनावत, भारत के नर नारी।
दसों दिशा मा होइस संगी, हमरो आज चिन्हारी।
गोल्डन युग हा खेल जगत के, देखौ जी लकठागे।
मेडल आगे मेडल आगे, जग मा नीरज छागे।।
भारत माता के सपूत मन, हरदम मान बढ़ाथें।
शक्ति स्वरूपा इहाँ के बेटी, जब्बर दम देखाथें।
सिंधु चनू बाक्सर लवलीना, फुलवा कस ममहागे।
मेडल आगे मेडल आगे, जग मा नीरज छागे।।
कुश्ती मा जी रवि दहिया अउ, वो पुनिया बजरंगी।
हाकी मा तो पुरुष टीम हा, नइ होवन दिच तंगी।
खेल देख महिला हाकी के,जिवरा हमर जुड़ागे।
मेडल आगे मेडल आगे, जग मा नीरज छागे।।
ओलम्पिक मा खेलिन तिन ला,हावय कोटि बधाई।
हार जीत तो होते रइथे, हिम्मत हे सुखदाई।
अब्बड़ तुँहर जुझारू पन हा, जन जन के मन भागे।
मेडल आगे मेडल आगे, जग मा नीरज छागे।।
चोवा राम वर्मा 'बादल'
हथबंद, छत्तीसगढ़
No comments:
Post a Comment