गीत- बने करे भगवान(सरसी छंद)
काम घूस खाये के दै नइ, बने करे भगवान।
महिनत करथौं पइसा पाथौं, नइ डोले ईमान।
पचे नहीं फोकट के पइसा, जस आये तस जाय।
होथे बिरथा बड़का बनना, कखरो ले के हाय।।
बने करम नित करत रहौं मैं, भरत रहै धन धान।
काम घूस खाये के दै नइ, बने करे भगवान।।
खून पछीना के धन दौलत, देवय चैन सुकून।
जादा के हे लालच बिरथा, लोभ मोह ए घून।
बने करम के होथे पूजा, करम धरम अउ दान।
काम घूस खाये के दै नइ, बने करे भगवान।।
घूसखोर के गत देखे हँव, माया पइस न राम।
लरहा बनके घुमते रहिगे, होगिस काम तमाम।।
इँहें सरग हे इँहें नरक हे, लिखथे करम विधान।
काम घूस खाये के दै नइ, बने करे भगवान।।
जीतेन्द्र वर्मा"खैरझिटिया"
बाल्को,कोरबा(छग)
No comments:
Post a Comment