कुंडलियाँ छंद- दर्जी अउ देवारी
देवारी के हे परब, तभो धरे हें हाथ।
बड़का धोखा होय हे, दर्जी मन के साथ।
दर्जी मन के साथ, छोड़ देहे बेरा हा।
हे गुलजार बजार, हवै सुन्ना डेरा हा।
पहली राहय भीड़, दुवारी अँगना भारी।
वो दर्जी के ठौर, आज खोजै देवारी।1
कपड़ा ला सिलवा सबें, पहिरे पहली हाँस।
उठवा के ये दौर मा, होगे सत्यानॉस।
होगे सत्यानॉस, काम खोजत हें दर्जी।
नइ ते पहली लोग, करैं सीले के अर्जी।
टाप जींस टी शर्ट, मार दे हावै थपड़ा।
शहर लगे ना गाँव, छाय हे उठवा कपड़ा।
दर्जी के घर मा रहै, कपड़ा के भरमार।
खुले स्कूल कालेज या, कोनो होय तिहार।
कोनो होय तिहार, गँजा जावै बड़ कपड़ा।
लउहावै सब रोज, बजावैं घर आ दफड़ा।
कपड़ा सँग दे नाप, सिलावैं सब मनमर्जी।
उठवा आगे आज, मरत हें लाँघन दर्जी।
जीतेंद्र वर्मा"खैरझिटिया"
बाल्को,कोरबा(छग)
No comments:
Post a Comment