विश्व ओजोन-परत संरक्षण दिवस" (छत्तीसगढ़ी)*

*"विश्व ओजोन-परत संरक्षण दिवस" (छत्तीसगढ़ी)*

कुदरत के ओजोन परत हा, रक्षा करत हवय दिन-रात

पराबैगनी किरण रोक के, ये नइ होवन दे आघात।

पराबैगनी किरण हमर बर, ले के आथे घातक रोग

बी पी साँस मोतियाबिंद सँग, कैंसर के बनथे संजोग।

ऊपर इकतिस मील भुईं के, येकर परत बने हे ढाल

बिना परत के जीव जंतु के, खच्चित होही बाराहाल।

क्लोरोफ्लोरोकार्बन कारण, होवत हावै एमा छेद

फ्रिज ए सी के गैस कवच ला, ऊपर जाके देथे भेद।

आवव भइया जुरमिल के अब, संरक्षण बर करन उपाय

कसनो कर ओजोन परत ला, हर हालत मा जाय बचाए।

*अरुण कुमार निगम*