आल्हा छंद - शकुन्तला शर्मा

सही कहत हे फागुन पुन्नी

कर्म कलम हर भाग बनाथे, मोर बात ला सब पतियाव
मनखे जन्म मिले हे बढिया, सोच समझ के पाँव बढाव।

हाथ गोड हर कर्म करत हे, पाप पुण्य के मालिक भाव
भाव प्रमुख ए हर प्राणी मा, भाव मुताबिक सुख दुख पाव।

देख होलिका खुद जर जाथे, बाँचिस हे बपुरा प्रहलाद
साँच आँच ले नइ घबरावै, कतको बड होवय जल्लाद।

होरी मा झन रंग लगावव, हरदी के बस टीका टीक
पानी ला झन खूब बहावव, मनखे मुँहरन रहव सटीक।

अरसा कुशली खाव खवावौ, नाचौ गावौ सब परिवार
दया मया धर के बतियावव, करव समस्या के निरवार।

हरियर रुख ला झन काटव रे, एहर पाप कर्म ए जान
कचरा के होरी बारव रे, सही बुता के कर पहिचान।

भाँग धतूरा झन पीहौ जी, सब झन ला जावव समझाव
बहिनी मन के हाथ बँटावौ, वोहू मन ला भलुक बचाव।

देश धर्म सबले आघू हे, तेकर पाछू सबो तिहार
सही कहत हे फागुन पुन्नी, होरी के कर जय जयकार।

रचनाकार -शकुन्तला शर्मा,
भिलाई, छत्तीसगढ़