मेला ( सार छंद)
भीड़ लगे हे अब्बड़ भारी , सबझन जावत मेला ।
धक्का मुक्की होवत हावय , होवत रेलम पेला ।।
कोनो करथे हरहर गंगे , कोनों डुबकी मारे ।
दर्शन करथे मंदिर जाके , पुरखा अपने तारे ।।
फूल चढ़ाये कोनों संगी , कोनों नरियर भेला ।
धक्का मुक्की होवत हावय , होवत रेलम पेला ।।
किसम किसम के खेल खिलौना , मेला मा सब आये ।
खई खजाना ले दे बाबू , लइका मन चिल्लाये ।।
दाई लेवय गरम जलेबी , बाबू लेवय केला ।
धक्का मुक्की होवत हावय , होवत रेलम पेला ।।
जगा जगा हे खेल तमाशा , भीड़ लगे हे भारी ।
कोनों फेंकत पइसा कौड़ी , कोनों देवय गारी ।।
जिनगी के मेला मा संगी , बहुते हवय झमेला ।
धक्का मुक्की होवत हावय , होवत रेलम पेला ।।
महेन्द्र देवांगन माटी
पंडरिया छत्तीसगढ़
8602407353
बहुत-बहुत बधाई हो माटी सर
ReplyDeleteबधाई हो भैया,बहुत सुग्घर मेला के बखान करे हव👏👏👌💐
ReplyDeleteसुग्घर रचना,बधाई
ReplyDelete