चन्द्रशेखर आजाद (आल्हा छन्द)

 चंद्रशेखर आजाद

गाँव भाभरा के माटी ला, माथा सबझन अपन नवाव

तीरथ कस ये पावन भुइयाँ, एखर महिमा ला सब गाव |

धन्य-धन्य दाई जगरानी, बेटा अइसन तैं हर पाय

जे ला छू नइ पाइन गोरा, जग मा वो आजाद कहाय |

चौंड़ा छाती देख वीर के, बैरी मन के लहू अटाय

जब गरजय तब काँपय पापी, सुनय फिरंगी रहय लुकाय |

उघरा देंह जनेव खान्ध मा, रौबदार मूछा कर्राय

देश अपन आजाद करे के, किरिया ओ अंतस मा खाय |

भारत माँ के दुःख दरद के, चिंता ओला

सदा सताय

नान्हेंपन मा सोंटा खा के, जय-जय भारतमाता गाय |

वीर भगत बिस्मिल के संगी, भारत माता के वो लाल

देशभक्त जननायक जब्बर, दुश्मन मन बर सउहत काल |

काकोरी बमकांड करिस हे, लाला के लेइस प्रतिकार 

मुखबिर सात सैकड़ा मिल के, पा नइ पाइन येखर पार |

वीर भगत कइसे कर छूँटय, करत रहिस इकदिन जब बात

नाट नाव के कुकुर बाग मा, रहिस लगाए अपने घात |

छेंक शेर ला सबो फिरंगी, दल के दल बंदूक  चलाय 

एक अकेला हर बैरी बर, ताकत मा भारी पर जाय |

देख फिरंगी मन आजाद के, काल रूप ला बड़ थर्राय

कखरो माथा कखरो छाती, एक-एक कर छेदत जाय |

दूनो डाहर छूँटय गोली, दनदन दनदन दनदन धाँय 

पत्ता-पत्ता रूख राई सब, शेखर के जय जय जय गाय |

लड़िस वीर सौ-सौ बैरी ले, लहू सनाये जम्मों अंग

देख लगय अभिमन्यु जइसे, लड़त हवय कौरव के संग |

जाव छोंड़ के संगी मोला,आंदोलन ये रूक

झन पाय

कहिस सुनव आजाद राज ले, भले प्राण ये मोर गँवाय |

काया लथपथ रहय लहू ले, गोली मन सब रहय बढ़ाय

एक आखिरी गोली ओ हर, रहय जेब मा अपन लुकाय

माटी ला मूठा धर के ओ, कहिस भारती माता मोर

कर पायेंव अतके भर सेवा, जावत हे बेटा अब तोर |

जब-जब जनम धरँव धरती मा, तोर मया के पाँवव छाँव

फेर इही धरती मा खेलव, फेर मिलय ये सुग्घर गाँव |

कहि पिस्तोल अपन माथा मा, गोली ओहर दिस चलाय

गिरिस देह धम ले भुइयाँ मा, मानो परबत हर गिर जाय |

नइ आवव मैं कभू हाथ मा, जीते जी जे किरिया खाय

शेखर बेटा लड़े शेर कस, किरिया तै सच कर देखलाय |

तोर शहीदी के रद्दा ले ,ये आजादी भारत पाय

त्याग संग बलिदान तोर ला, सकय नहीं कोनो बिसराय ||

सुनिल शर्मा नील

बेमेतरा(छत्तीसगढ़)

7828927284

8839740208

(सर्वाधिकार सुरक्षित)