सरसी छन्द - श्री कन्हैया साहू "अमित"

शिवविवाह के बरतिया वर्णन - 

फागुन चउदस तिथि के बेरा, शिव के आज बरात।

सज संवर के सबो बराती, एक जघा सकलात।~1

बिकट बरतिया बिदबिद बाजँय, चाल चलय बेढ़ंग।

बिरबिट करिया भुरुवा सादा, कोनो हे छतरंग।।~2

कोनो उघरा उखरा उज्जट, उदबिदहा उतलंग।

उहँदा उरभट कुछु नइ घेपँय, उछला उपर उमंग।|~3

रोंठ पोठ सनपटवा पातर, कोनो चाकर लाम।

नकटा बुचुवा रटहा पकला, नेंग नेंगहा नाम।।|~4

खरभुसरा खसुआहा खरतर, खसर-खसर खजुवाय।

चिटहा चिथरा चिपरा छेछन, चुन्दी हा छरियाय।।~5

जबर जोजवा जकला जकहा, जघा-जघा जुरियाय।

जोग जोगनी जोगी जोंही,  बने बराती जाय।।~6

भुतहा भकला भँगी भँगेड़ी, भक्कम भइ भकवाय।

भसरभोंग भलभलहा भइगे, भदभिदहा भदराय।।~7

भकर भोकवा भिरहा भदहा, भूत-प्रेत भरमार।

भीम भकुर्रा भैरव भोला, भंडारी भरतार।।~8

मौज मगन मनमाने मानय, जँउहर उधम मचाय।

चिथँय कोकमँय हुदरँय हुरमत, तनातनी तनियाय।।~9

आसुतोस तैं औघड़दानी, अद्भूत तोर बिहाव।

अजर अमर अविनासी औघड़, अड़हा अमित हियाव।।~10

सरल सबल सत सुग्घर शिव हे, सकल सगुन संज्ञान।

किरपा करके कनहइया के, करहू अब कलियान।।~11

छन्दकार - श्री कन्हैया साहू "अमित"

शिक्षक~भाटापारा (छत्तीसगढ़)

संपर्क~9200252055