हरिगीतिका छंद-श्री सुखदेव सिंह अहिलेश्वर

जिनगी पहावत जात हे

दुख ला धरे सुख ला धरे,जिनगी पहावत जात हे।

कखरो अवइया साँझ हे,कखरो पहाती रात हे।

कोन्हो जगावैं जाग के,कोनो उँघावत हें इँहा।

आखिर मना थक हार के,चूल्हा जलावत हे इँहा।

कोनो कुलुप अँधियार मा,दीया जलावत जात हें।

भटकँय न कोनो राह मा,रस्ता दिखावत जात हें।

होवय कहूँ त्यौहार ता,कोन्हो मनावँय गम इँहा।

सुख मा हँसत हे आँख हा,दुख मा नयन हे नम इँहा।

कोनो परे परपंच मा,अंतस अपन भरमात हें।

कोनो शबद साबुन धरे,मन मइल ला उजरात हें।

अरजी हवै परमातमा,अँगुरी दसो ठन जोर के।

रस्ता धराहौ हे पिता,जिनगी ल सुग्घर भोर के।

                रचनाकार-सुखदेव सिंह अहिलेश्वर

                        गोरखपुर,कवर्धा छत्तीसगढ़