सुखी सवैया - आशा देशमुख

1--तृष्णा मोह

जिनगी हर बीतय जोरत जोरत अंत समे कुछु काम न आवय ।

सब मोह मया भुलवारत हे अउ छूटत साँस सबो तिरियावय ।

गिनके मिलथे जिनगी दिन हा तब ले मनखे मन जाय भुलावय

कतको भलमानुष हे जग मा जस के करनी कर नाम कमाय।

2--बलि

बदना बदके बलि देवत हे कतको मनखे मन देव मनावय|

झन मारव जीव जनावर ला सब मा सुनले भगवान समावय|

नइ माँगय देव कभू कउनों बलि ये मनखे मन रीत बनावय|

कुकरा बकरा बधिया कहिके मनखे जिभिया रस स्वाद बतावय|

3--आज का चित्रण

पहली बिहने हरिनाम भजे अउ राम कहे जय राम कहे सब ।

अब तो उठके सब फोन धरे अउ कॉल करे मिस कॉल करे तब |

युग हा बदले मनखे बदले तकनीक नवा सब बौरत हे अब ।

रतिया भर जागय नेट धरे दिन मा सुसतावय काम करे कब ।

4--नवा साल के बधाई

शुभ होवय साल नवा सबके जिनगी हर सुघ्घर सुन्दर बीतय |

परिवार सबो खुशहाल रहे सुख के तरिया ह कभू झन रीतय|

सुख मान मया सुमता नित बाढ़य दुःख सुवारथ ला सब जीतय|

दुनियाँ भर नाम करे जस के मनखे मन प्रेम मया रँग छीतय ।

5--

सब खोजय मंदिर तीरथ मा अउ खोजत हे तुंहला बन मा प्रभु| 

कउनों नइ झांकय अंतस ला बइठे  हिरदे रहिथौ मन मा प्रभु ।

नइ रीझव राज सिंहासन मा नहि दौलत मा नइतो धन मा प्रभु 

बस भाव भरे मन उज्जर देखव रीझव बोइर माखन मा प्रभु ।

छंदकार - आशा देशमुख , छत्तीसगढ़