अरविंद सवैया - आशा देशमुख

1- मनखे

मनखे अतका चतुरा बनगे मन ही मन सोचत हे भगवान ।

सुख में सुमिरै तक नाम नही दुख मा सब बोलत हे भगवान ।

तन थोकिन जर्जर होवत हे कहिथे तब घोरत हे भगवान ।

खुद आलस में मनखे रहिथे अउ बोलय सोवत हे भगवान ।

2 - क्षमा याचना

जिभिया गलती कर डारिस हे पर अंतस पावन हे गुरुदेव ।

पथरा पटके कस लागत हे अँखिया बर सावन हे गुरुदेव ।

परछो गुरु लेवत हे कहिके मन मोद उछावन हे गुरुदेव ।

जड़ हे मति मोर क्षमा कर दौ मुड़ लाज लजावन हे गुरुदेव ।।

3 -पूस के रात

बिन कंबल के तरसे हलकू जब आइस पूस जनाइस जाड़ ।

अति ठंड लगे ठिठुरे तन हा अउ हाँथ जुड़ावय काँपय हाड़ ।

जबरा बइठे रतिया भर संग म पूँछ  हिलावय पावय लाड़ ।

बिहने हलकू जब खेत ल देखय रोवय अब्बड़ गा बम फाड़ ।

4 - गुरु

मनखे मनखे सब एक हवे ,गुरु ज्ञान दिया सत जोत जलाय ।

सुमिरै गुरुनाम तरे भवसागर अंतस मा लहरा लहराय ।

दिन रात बरे सत जोत जिहाँ सुख के अँवरा सब ओर समाय ।

जिनगी सुधरे सब ताप मिटे सत के रसता गुरु ज्ञान बताय ।

5-तिवरा बटरा

तिंवरा बटरा गहदे अति सुघ्घर देखत ये मन हा हरसाय ।

अति कोंवर कोंवर पान उलोहय  अब्बड़ इंखर साग मिठाय ।

धरके जब हाट म लाय मरारिन भाव बढ़ाय तभो बिक जाय ।

अतका मन भावत हे तिंवरा बटरा सबके मन ला ललचाय ।

छन्दकार - आशा देशमुख, कोरबा, छत्तीसगढ़