छप्पय छंद- मोहन लाल वर्मा

छप्पय छंद- मोहन लाल वर्मा

            (1)मेहनत के फल

मन मा रख विश्वास, मेहनत जे करथे जी।
जग मा वो इतिहास, अमरता के गढ़थे जी।।
पाथे बड़ सम्मान, करम के पाछू भइया ।
जस के गाथे गीत, गगन-धरती पुरवइया ।।
परमारथ के काज ला,करथे करतब जान के ।
पाथे जी आशीष ला,सउँहे वो भगवान के ।।

            ( 2)पानी के मोल

सुक्खा परगे फेर, देख तो तरिया - नदिया ।
कइसन हाहाकार, मचे हे सारी दुनिया ।।
बिन पानी संसार, फेर गा चलही कइसे ।
तड़पत रइहीं जीव,सबो गा मछरी जइसे ।।
होही पानी के बिना, सुन्ना ये संसार गा।
जानव एकर मोल ला,पानी जग आधार गा।।

              (3) नारी के रूप

जेन बढ़ाथे मान ,ददा के वो बेटी ये ।
पबरित मया खदान, ज्ञान धन के पेटी ये ।।
माता-बहिनी रूप, धरे ये जग मा आथे ।
अमरित गोरस पान,करा ममता छलकाथे ।।
दुर्गा-लक्ष्मी-शारदा, बेटी के अवतार हे ।
झन मारव जी कोंख मा,बेटी ले संसार हे ।।

               (4)रक्षाबंधन

सावन पुन्नी खास,मनाथें रक्षाबंधन ।
बहिनी राखी बाँध, लगाथे रोली चंदन।।
भाई दे उपहार, मया बहिनी के पाथे।
रक्षा के जब डोर, कलाई मा बँध जाथे।।
भाई-बहिनी के मया, हे अटूट संसार मा।
रक्षाबंधन के परब, दिखथे जे परिवार मा।।

             (5)मया के रंग-होली

चुपर मया के रंग ,मना लव सुग्घर होली ।
झन बिगड़य व्यवहार, बोल लव गुरतुर बोली।।
जिनगानी के काय,भरोसा हाबय भइया ।
ये तो हे जस बीच, धार मा डोलत नइया।।
लीला ला भगवान के, देखव तो संसार मा।
रंग मया के दे हवे,मनखे ला उपहार मा।।

             (6)करना हे मतदान

करना हे मतदान,सजग बनके मतदाता ।
लोकतंत्र के मान,बढ़ावव मिलके भ्राता ।।
सब ला हे अधिकार,जागरुकता ये लावव ।
जाके घर-परिवार, सबो ला ये समझावव ।।
संविधान ले हे मिले,जनता ला अधिकार गा।
चुनथें  भारत देश मा,अपने बर  सरकार गा।।

           (7)शीत लहर के मार

काँपत हाबय जीव, जाड़ मा अबड़े भइया ।
सर-सर सर-सर रोज,चलत हे जुड़ पुरवइया।।
कतको स्वेटर शाॅल, ओढ़ना कमती लागय ।
कहिथे मोहन लाल, जाड़ हा कब गा भागय ।।
कोन बुताही जाड़ ला,जुड़हा होगे घाम जी।
शीत लहर के मार मा,काँपय हाड़ा-चाम जी।।

            (8)आगे हे नवरात

आगे हे नवरात, बरत हे दियना बाती।
जगमग-जगमग जोत, करय उजियारी राती ।।
माता के दरबार, भगत मन आथें जाथें ।
करके पूजा-पाठ, शक्ति ला माथ नवाथें ।।
माता के नवरूप के,करलव दरशन आज गा।
श्रद्धा ले सब पूज लव,बनही बिगड़े काज गा।।

   छंदकार- मोहन लाल वर्मा
  पता- ग्राम- अल्दा,पो.आ.-तुलसी (मानपुर)
       व्हाया-हिरमी,वि.खं.-तिल्दा,जिला-रायपुर
      (छत्तीसगढ़), पिन 493195.