विष्णु पद छंद-द्वारिका प्रसाद लहरे

विष्णु पद छंद-द्वारिका प्रसाद लहरे

सुमता के रद्दा मा रेंगव,दया मया धरके।
मया बाँट लौ सब मनखे ले,झोली भर भरके।।

बनव सहारा दुखिया मन के,दुख पीरा हरलौ।
येही जग मा सार हवय जी,नेक करम करलौ।।

बैर-भाव ला छोड़ौ जम्मो,मनखे एक सबो।
भाई-भाई हावन सब गा,जुरमिल संग रबो।।

जात-पात हा हमर बनाये,ए ला कोन धरे।
छोड़व मन के इरखा संगी,मन संताप हरे।।

भाई-चारा बाढ़त जावै,अइसन काम करौ।
करै द्वारिका सार गोठ जी,मन मा ध्यान धरौ।।

छंदकार-द्वारिका प्रसाद लहरे
बायपास रोड़ कवर्धा/