सार छंद--सुधा शर्मा

सार छंद--सुधा शर्मा

1-
जघा जघा मा मिलथे संगी,
देखव अब तो दारू।
भठ्ठी खुलगे पीयत बइहा,
माते नशा म कारू।
2-
गारी देवत फोर फोर के,
लाज शरम ला छोड़े।
मारा पीटी संग सुवारी,
मूड़ी कान ल फोड़े।
3-
लइका इस्कुल जावत हावें
लादे पीठ म बोझा।
कोंवर लइका उमर बँधाये,
किसिम किसिम के जोझा।
4-
मूड़ी बड़का पागा होगे
बेरा कइसन आगे।
धरे नवा रद्दा ला देखव,
सपना पीछू भागे।
5-
धरती मात गुहार लगावै,
बाढ़त हावे पीरा।
मनखे करनी बिगरत हावे,
गुण मा परगे कीरा।
6-
धुंआ अगास पीयत आकुल
बिगड़े धरती काया।
देखत मनखे अपन सुवारथ,
काटे रुखवा छाया।
7-
जंगल झाड़ी उजरत हावें,
नँदिया तरिया रोवत।
पथरा परगे बुद्धि म सबके,
अपने सुख ला खोवत।
8-
रंग रंग के होत बिमारी,
होय जहर कस पानी।
भरत अन्न पानी मा दवई,
बिपदा मा जिनगानी।
9-
झिल्ली गा झन बउरव कोनो,
गइया मन सब खाथें।
मूक होय गउ माता संगी,
अपने मौत बलाथें।
10-
धरती दाई के कोरा मा,
झिल्ली गल नइ पावय।
करे अन्न धन के नुकसानी,
परिया खेत बनावय।

छंद कारा--
सुधा शर्मा
राजिम छत्तीसगढ़