शक्ति छंद- मोर मयारू 122 122 122 12

 शक्ति छंद- मोर मयारू

122   122   122   12

~~~~~~~~~~~~~~~~~

चले आ मयारू,हमर गाँव मा।

इहाँ मोर पइरी,बजे पाँव मा।।

गजब तोर सुरता,सतावत रथे।

गुनत रात दिन हा,पहावत रथे।।

न दिन हा सुहावै,नहीं रात हा।

करौं का मयारू,बनै बात हा।। 

बना दे ठिकाना,सुघर ठाँव मा।

चले आ मयारू,हमर गाँव मा।।

भुलावै नहीं रे, मया के डगर।

कहाँ जाहुँ संगी,कहाँ हे बसर।।

लगाले न सँग मा,तुँहर नाँव मा।

चले आ मयारू,हमर गाँव मा।।

दयावान   तैंहा, दिखादे  दया।

बलाले भुला झन,बचाले मया।। 

पिरोहिल अगोरत,रहूँ छाँव मा।

चले आ मयारू,हमर गाँव मा।।

~~~~~~~~~~~~~~~~~

छंदकार:-

बोधन राम निषादराज

सहसपुर लोहारा,कबीरधाम