छन्द खजाना : संत शिरोमणि बाबा घासीदास जयंती विशेष छंदबद्ध कविता

संत शिरोमणि बाबा घासीदास जयंती विशेष छंदबद्ध कविता

: *मानव समाज बर संत शिरोमणि गुरु घासीदास बाबा जी के अमर कुछ संदेश * दोहा छंद* मा

*मनखे हर मखने रहे, छोड़े सबो कलेश।*

*जग ला राह दिखाय बर, घासी के संदेश।।*

1. *सतनाम को मानो*

सुग्घर सबले सार हे, जग मा जी सतनाम।

सत के रद्दा जे चलय, बन जय बिगड़े काम।।

2. *मूर्ति पूजा मत करो*

दाई बाबू देव हे, खोजव झन भगवान।

मन के जाला झार रख, मूरत अंतस मान।।

3.*जाति-पाति के प्रपंच से दूर रहो*

ऊॅंच नीच के भेद ला, मूरख मन छोड़।

प्रभु के हम संतान सब, मीत मया रख जोड़।।

4.*मॉंसाहार मत करो जीव हत्या मत करो*

जेवन जेवव जीव झन, बनके मॉंसाहार।

प्राकृति सम सुग्घर रखे, खुशी रहे संसार।।

5. पर स्त्री को माता मानो*

सरग बरोबर मातु के, हावै अॅंचरा छॉंव।

नारी के सम्मान ले, उज्जर रहिथे ठॉंव।।

6.*मदिरा सेवन मत करो*

पीयव झन दारू कभू, उजरे घर परिवार।

कुकुर सरी जिनगी रहे, बने सबो बर भार।।

7.*अपरान्ह खेत में मत जाओ*

जोत मझनिया खेत झन, थोड़कनी सुरताव।

बइला सॅंग सॅंग देह ला, छइॅंहा बइठ जुड़ाव।।

*मानव समाज बर संत शिरोमणि गुरु घासीदास बाबा जी के अमरित बानी के कुछ संदेश * चौपाई छंद* मा

1. अमरित बानी

*सत्य ही मानव का आभूषण है*

घासी बाबा हावै कहना, सत्य नाम के पहिरव गहना।

हिरदे मा सतनाम बसाले, जाये के तॅंय राह बनाले।।

2. अमरित बानी

*मानव मानव एक समान*

मनखे मनखे सम तुम जानौ,भेद भाव झिन मन मा लानौ।।

बॉंटव समता भाई चारा, जात पात ला मेटव सारा।।

3. अमरित बानी

*गुरु बनाये जान के पानी पीये छान के*

अइसन गुरु के लेवल दीक्षा, करनी जेकर देवय शिक्षा।

करे अशिक्षा दुरिहा गुरुवर, मन मा भाव जगावय सुग्घर।।

4. अमरित बानी

*हीन भावना मन से हटाये*

ऊॅंच नीच के भेद ल छोड़व, धरम करम ले रिस्ता जोड़व।।

सार जगत मा करनी जानौ, हीन मान झिन मन मा लानौ।।

5. अमरित बानी

*सत्य और ईमान में अटल रहें*

सत्य सार हे जग बलशाली, लाये जिनगी मा खुशहाली।

झूठ लबारी धक्का खाथे, मान कहॉं अउ वोहर पाथे।।

6. अमरित बानी

*जैसा खाये अन्न वैसा बनेगा मन*

मिहनत के रोटी सुख लाथे, रोग दोष ला काट भगाये।

अउ येहर होथे गुणकारी, भर भर खावव रोजे थारी।।

7. अमरित बानी

*मेहनत ईमान का रोटी सुख का आधार*

मिहनत करके तुम खावव अन, सदा सुखी होही तन अउ मन।

रोग दोष नइ कभू सतावय, गार पसीना जेहर खावय।।

8. अमरित बानी

*क्रोध और बैर को जो त्याग देता है उसका हर कार्य बन जाता है*

छिन छिन मा जे गुस्सा करथे, बैर बढ़ाके भरभर जरथे।

क्रोध बैर जे मन नइ लावय, काम सुफल वो झट कर जावय।।

9. अमरित बानी

*दान कभी नइ माॅगना चाहिए, और न ही उधार लेना-देना चाहिए*

दान मॉंग जे फोकट खाथे, चोरी बइमानी ल बढ़ाथे।

करजा बोहे जिगनी जीथे, महुरा अपमानी के पीथे।।9।।

10. अमरित बानी

*दूसरे का धन हमारे लिए कोड़ी के समान है*

रोजे जाॅंगर पेर कमावव, पर के धन मत नजर गड़ावव।।

पर के धन ला माटी जानौ, लोभ मोह झिन मन मा सानौ।।

11. अमरित बानी

*मेहमान को साहेब के समान समझो*

गुरतुर बानी पहुॅंना बॉंटव, छोटे बड़का मा मत छॉंटव।

प्रेम करव जइसे के भगवन, रखथे सदा भगत बर नित मन।।

12. अमरित बानी

*सगा के जबर बैरी सगा होथे*

निज भाई के संग लड़व झन, भाव एकता के राखव मन।

काम इही दुख दुख मा आही, जिनगी ला अउ सरग बनाही।।

13. अमरित बानी

*सबर के फल मीठा होथे*

करनी कर तॅंय धीरज धर रे, आही बेरा लगही फर रे।

जिनगी हर तोरो महहाही, नवा बिहनिया कारज लाही।।

14. अमरित बानी

*मया के बंधना असली ये*

मनखे मनखे सबो बरोबर, जुरमिल राहव हिलमिल सुग्घर।

जिनगी बिरथा मया बिना हे, जइसे तन ला लगे घुना हे।।

15. अमरीत बानी

*दाई-ददा अऊ गुरु ला सनमान देवव*

मान रखव गुरु बाबू दाई, जिनगी गढ़थे ये सुखदाई।

तोर पॉंव दय न गड़न कॉंटा, सरग घलो दे तोरे बॉंटा।।

16. अमरित बानी

*दाई ह दाई आय, मुरही गाय के दूध झन निकालहव*

रखे माह नौ पेट सरेखे, तोर खुशी निज हित नइ देखे।

अमरित बरसे छाती जेकर, आय बुढ़ापा दुख मत झिन भर।।

17. अमरित बानी

*इही जनम ला सुधारना सॉंचा हे*

मनखे जनम सार हे जानौ, भेद पाप पुन मा तुम मानौ।

आय जाय के राह छुड़ाले, सुघर मुक्ति के राह बनाले।।

18.अमरित बानी

*सतनाम घट घट मा समाय हे*

हे सतनाम खड़े घट घट मा, बसे धरा अउ अगास सत मा।

सुन सतनामी महिमा अड़बड़, सदाचार के जिनगी बड़हर।।

19. अमरित बानी

*गियान के पंथ किरपान के धार ए*

बिरथा जिनगी हे बिन शिक्षा, जइसे मॉंग चलत हे भिक्षा।

ज्ञान पंथ निज हक अधिकारी, जस किरपान धार बड़ भारी।।

20.अमरित बानी

*एक धूबा मारे तुहु तोरे बरोबर आय*

नीच काज हे करनी जेकर, कर अपमान घलो झन ओकर।

पथरा मारे चिखला छटके, दाग बने रहिथे ये चटके।

21.

*मोला देख, तोला देख, बेर कुबेर देख, जेन हक तेन ला बॉंट बिराज के खा ले।*

होय नहीं सुख यश धन ले मन, बड़हर मन ला तॅंय देख जतन।

सब हक रहे पेट भर थारी, खाव बॉंट सम तुम सॅंगवारी ।।

खाव नॅंगा हक झन दूसर के,

मनोज कुमार वर्मा

बरदा लवन बलौदा बाजार

💐💐💐💐💐💐💐💐💐💐💐

चौपई छंद)

सुन ले बाबा घासीदास,दिन हवय गा अड़बड़ खास।

करत हवन गा पूजा तोर,मँहगू के तैं लाला मोर।।

कतका करबो तोर बखान,महिमा हावय भारी जान।

सत के मारग ला तैं जान,अपन बनाये गा पहिचान।।

जात पात के भेद मिटाय, सत के बाबा अलख जगाय।

मनखे मनखे एक बताय,भाई चारा रहे सिखाय।।

नशा पान ला सबझन छोड़,राखव सबले नाता जोड़।

सत के राहव दिया जलाय, अंतस बाबा हवय समाय।।

सबला बाबा दे हे ज्ञान,अमरित बानी जेकर जान।

सत के मारग जे बतलाय,धरम धजा ला जी फहराय।।

गिरौदपुरी हवय जी धाम,जपलव संगी सब सतनाम।

सुनलव बाबा के संदेश,सबके मिट जाही गा क्लेश।।

रचनाकार:- राजेश कुमार निषाद ग्राम चपरीद रायपुर

💐💐💐💐💐💐💐💐💐💐💐💐

अल्हा छंद

मनखेमनखे एक हवै जी,कहगे बाबा घासीदास।

सत्यनाम ला सब झन मानौ,सत मा राखौ जी विश्वास।।

सुमता अउ भाई चारा के,बंधन बाँधे राखव खास।

एक दुसर सहयोग करौ जी,करदौ कुमता के तुम नास।।

सुनौ उदाली झन मारौ जी,चीज बचा के राखौ पास।

बिपदा मा तो काम ग आथे,धर गठिया के खासम खास।।

ताश जुआ हे बिगड़े रस्ता,नशा पान आवय जी काल।

जौन फँसे हे येकर फाँदा, माथा धर होगे बेहाल।।

गुरु बबा के एक बात हा,सच मा कतका मन ला भाय।

काम करत हे जौन खेत मा,खेती सिरतो ओकरे आय।

बेगारी हे लूट बरोबर,झन करहौ फोकट मा काम।

लइका बर दू रोटी लाना,तबही करना जी आराम।।

पर नारी महतारी जानौ ,पर धन ला जी पथरा जान।

सब झन बर सद्भाव रखौ जी। सदा बचाये राखौ मान।।

सत्त राह हा भले कठिन हे,सदा बढ़ा हव सत मा पाँव।

कर जाहू कुछ बने करम ला,जुग जुग चलही तब तो नाँव।।

नोनी बाबू एके हावै,झन करहौ कोनो मा भेद ।

शिक्षा के हथियार धराहू,गंगा सुख के लाही छेद।।

सती प्रथा हे पाप बरोबर,विधवा मा घलो होथे प्रान।

विधवा मन के व्याह रचाके,देवव नारी ला सम्मान।।

ऊँच -नीच के भेद मिटावत, छूत छुआ ला माने रोग।

जीव जगत के सेवा ला तै, कहे हवस ईश्वर से योग

धन्य हवै जी गुरु बाबा हा,इहाँ पंथ सतनाम चलाय।

दीन दुखी ला गला लगा के,मानवता के पाठ पढाय।।

✍️जुगेश कुमार बंजारे "धीरज'

छिरहा बेमेतरा छ्ग

9981882618

8739521702

💐💐💐💐💐💐💐💐💐

: मनहरण घनाक्षरी- विजेन्द्र वर्मा

सत के रहे पुजारी,पूजत दुनिया सारी,

जग मा अमर हवै,बाबा तोर नाम हा।

ऊँच-नीच ला मिटाके,सत राह ला दिखाके,

ज्ञान के अलख जगा,बाजिस हे काम हा।।

परहित सेवा करैं,दया मया भाव भरैं,

तभे तो दिखत हवै,आज परिणाम हा।

जय हो बाबा धाम के,जय हो सतनाम के,

सत के देय संदेशा,घासीदास धाम हा।।

विजेन्द्र वर्मा

नगरगाँव(धरसीवाँ)

💐💐💐💐💐💐💐💐💐