*सार छंद : - हमर जुन्ना चिन्हारी*

*सार छंद : - हमर जुन्ना चिन्हारी*

देखव संगी आज जमाना , कइसन हावय आगे ।
नवा चलागन के आये ले , जम्मो जिनिस नँदागे ।।

गाँव गली बस्ती सब सुन्ना , शहरी करन समागे ।
छोड़ गाँव के देशी भोजन , पीजा मन ला भागे ।।

हमर गाँव के भौरा बाँटी , गिल्ली घलव गँवागे ।
रंग रंग के रहय खिलौना , सुध सबके बिसरागे ।।

करव गोठ खेती बाड़ी के , रोवय धनहा डोली ।
हमर राज मा परता पड़गे , मोर मयारू बोली ।।

धान चना अउ तिवरा संगी , होवय बड़ ओन्हारी ।
नरवा गरवा घुरवा बारी , रहिस हमर चिन्हारी ।।

किसम किसम के भाजी पाला , सरसो चेच अमारी ।
पालक मेथी पटवा भाजी , सुरता आथे भारी ।।

दाई के जाँता हर भइया , देखव कहाँ लुकागे ।
ढेंकी बहना सबो भुलागे , मिल मसीन सब आगे ।।

चाउँर के जी चीला रोटी , संगी कोन बनाथे ।
अड़सा पुड़ी संग सोंहारी , हवय कोन अब खाथे ।।

रॉपा रपली कुदरा नाँगर  , बइला संग तुतारी ।
बिधना बसला संग पटासी , हमर गँवागे आरी ।।

बटकी मा बासी अउ चटनी , आज कोन जी खाही ।
बोली भाखा धनहा डोली , मान कहा ले पाही ।।

जतन करव जी मिलके संगी , आवय हमर चिन्हारी ।
भाखा महतारी हर पावय , मान आय हे पारी ।।

              रचनाकार - मयारू मोहन कुमार निषाद
             गाँव - लमती , भाटापारा , बलौदाबाजार