रोला छन्द - श्री कन्हैया साहू "अमित"

रोला छन्द - श्री कन्हैया साहू  "अमित"

किसान -

धनहा डोली खार,संग मा गाङ़ी बइला।
नाँगर जाँगर जोर,अन्न तैं देथच सबला।।
जगहित साधे काज,सबो के जीवन दाता।
बरुवा सिधवा पूत,तोर हे धरती माता ।।

टेटका -

मनखे बदले रंग,असल ला तोपे ढ़ाँके।
परके देखे दोस,अपन मा नइ तो झाँके।।
कथनी करना आन,दुसर ला पाठ पढ़ाथे।
अइसन दुनिया ढ़ंग,टेटका घलो लजाथे ।।

सुरता -

बढ़िया बीते आज,काल सुरता बन जाही।
करबो हित के काज,समे कब लहुरा आही।।
मानुस तन ला पाय,कभू झिन बिरथा पारव।
मन के संसो टार,मया के थरहा डारव।।

रचनाकार - कन्हैया साहू "अमित"
भाटापारा, छत्तीसगढ़