मत्तगयंद सवैय्या छंद - श्री सुखदेव सिंह अहिलेश्वर

मत्तगयंद सवैय्या छंद - श्री सुखदेव सिंह अहिलेश्वर

(1)
सावन के महिना बड़ पावन,काँवरिया बन पुन्न कमाबो।
फोंक नदी म नहावत खोरत मंदिर जाय के फूल चढ़ाबो।
काँवर मा जल बोह के आवत जावत शंकर के गुन गाबो।
देत असीस सदाशिव शंकर हाँथ लमावत माँगत आबो।

(2)          
खेत भरे न भरे मन मोर तभो बरसात के बूँद थिरागे।
का मन भीतर हे बदरा बिन कारन काबर मूड़ पिरागे।
काबर काम बिगाड़त हावस का बरसा जल तोर सिरागे।
कारन आज बता प्रभु काबर मोर किसान के भाग रिसागे।

(3)
हे गुरुदेव कृपा करहू मन मूरख मोर सुजान करौ जी।
काजर ले करिया मन हे गुरु उज्जर आप समान करौ जी।
अंतस हे कठवा पथरा गुरु मंत्र ले चेतन प्रान करौ जी।
लौह सही तन जंग लगे गुरु पारस आप धियान करौ जी।

(4)
पैजनिया ल बजावत रेंगत खोर गली ल जगावय गोरी।
हाँसत बोलत ठोलत जावत हे कनिहा लचकावय गोरी।
सेंट लगे महँगा कपड़ा तन अब्बड़ हे ममहावय गोरी।
सुग्घर हे सम्हरे पहिरे मुँह देखत मा सरमावय गोरी।

(5)
तीज तिहार लगे मनभावन जे बड़ पावन रीत धरे हे।
द्वार सुहावन लागत हे जस आज नता जग जीत डरे हे।
गाँव गली मुसकावत हे बहिनी मन के शुभ पाँव परे हे।
आज सबे हिरदे खुश हे बिटिया बर सुग्घर भाव भरे हे।

(6)
आज पधारत हे गणराज चलौ मिलके करबो अगुवानी।
नाँव गणेश गजानन जेखर मातु हवै गउरी महरानी।
कातिक जेखर बन्धु लगे अउ बाप सदाशिव औघट दानी।
झाँझ मृदंग धरौ मनुवा सँग श्रीफल हाथ चरू भर पानी।

रचनाकार - सुखदेव सिंह अहिलेश्वर
ग्राम - गोरखपुर (कवर्धा) जिला - कबीरधाम
छत्तीसगढ़