हरिगीतिका छन्द - श्री ज्ञानु दास मानिकपुरी

हरिगीतिका छन्द - श्री ज्ञानु दास मानिकपुरी

(1)
काखर भरोसा ला करवँ,संसार मा स्वारथ भरे।
मनखे कहाँ मनखे हवै,बूता अपन मनके करे।
अफसर बने नेता बने,हावै धरे सब लोभ ला।
करलवँ कमाई नेक के,सब छोड़ इरखा खोभ ला।

(2)
जिनगी सफल होवै नही,कखरो बिना सतकाम जी।
झन काम अइसन जी करो,होवय इहाँ बदनाम जी।
छोड़वँ अपन मनके भरम,करलवँ बने तुम काम ला।
हिरदै रखवँ श्रीराम ला,हरदम जपवँ जी नाम ला।

(3)
गुरु के चरन बंदन करौ,मेटै भरम यम जाल ला।
हिरदै बसाओ ज्ञान ला,सुग्घर अपन रख चाल ला।
दे सौंप नैया हाथ मा,माया लगे बाज़ार हे।
गुरु के कृपा बिन जान ले,नैया कहाँ के पार हे।

(4)
करबो जतन मिलके सबो, नइ काटबो हम पेड़ ला।  
सजही तहाँ हर खेत हा, हरियर बनाबो मेड़ ला।।
मिलथे उहाँ छँइहा बने,जँह पेड़ के भरमार हे।
बड़ भाग ला सहरात हन,फल फूल बड़ रसदार हे।।

(5)
सुग्घर जिहाँ परिवार हे,रिश्ता नता के जोर हे।
छूटै नही बँधना कभू,बाँधे मया के डोर हे।
सुनता दिखत नइये इहाँ,चारों तरफ गा शोर हे।
पाबे कहाँ अब गॉव मा,सुन्ना गली अउ खोर हे।

(6)
सुन्ना गली अउ खोर हे,बाढ़े दुराचारी इहाँ।
बेटा लगावत दाँव हे,बइठे ददा देखत जिहाँ।
रिश्ता निभाही कोन हा,मन मा भरे अभिमान हे।
मनखे धरम भूले हवै,बइठे बने शैतान हे।

(7)
दाई बिचारी रोत हे,अँखियन धरे आँसू बहे।
बेटा बहू बोलै नही,कोंदी बने चुप दुख सहे।
दुनिया बने अँधरा हवै,कखरो नजर मा नइ दिखे।
कइसे जमाना देख के,कवि ज्ञानु रो रो के लिखे।

रचनाकार - श्री ज्ञानु दास मानिकपुरी
छत्तीसगढ़