मत्तगयन्द सवैया - श्री दुर्गाशंकर इजारदार

 मत्तगयन्द सवैया - श्री दुर्गाशंकर इजारदार

(1)
पाकर के सुन मानुस के तन काबर तैं अति सोचत लाला ।
नाम कमा सुन रे मन मूरख काबर काम करे अति काला ।
राम जपे नइ तैं हर काबर डार रखे हस रे मुँह ताला ।
जावत तोर हिसाब करे यम देखत दौड़त मारत भाला ।

(2)
:मात पिता अपमान करे हस खोजत मान कहाँ अब पाबे ।
मान मिले जग में जब सोचत मात पिता झन तैं बिसराबे ।
कोंख जने उँगली धर रेंगत छोड़ के साथ कहाँ  अब जाबे ।
छाँव करे ममता अँचरा जब दुःख भगा सुख भोर नहाबे ।

(3)
राम के काम करे जग में बजरंग बली तँय नाम धराए ,
लाल धरे हस रूप सदा धर हाथ गदा हनुमंत कहाए,
दूत बने हस राम सिया सुन खोजत रावण धाम जलाए ,
राम सिया गुन गावत गावत लक्ष्मण के तँय जान बचाए ।

(4)
जंगल मा अब मंगल खोजत देख नहीं अब पावस भारी ।
रूख कटे ठुठवा सब होवत काबर जोर चलावत आरी ।
जंगल मा चिमनी बइठे बर आवत कागज हे सरकारी ।
थोकुन सोचव रूख लगालव मेंड़ तरी बखरी अउ बारी ।

(5)
हे गणनायक मोर गजानन हावस तैं सुन भाग विधाता ।
सेवक मैं अउ मालिक तैं अस भावत हावय सुग्घर नाता ।
चार भुजा मन मोहत हावय दुःख हरे सुख देथस दाता ।
शंकर हावय तोर ददा अउ पारवती सुन हावय माता ।

(6)
 नाम अनेक धरे जग तारण रूप अनंत धरे बनवारी ।
मोहन माधव केशव निर्गुण हे मुरली धर हे त्रिपुरारी ।
हे अचला अजया अनया बलि कृष्ण दयानिधि पुण्य मुरारी ।
श्याम सुदर्शन विष्णु निरंजन हे मधुसूदन हे सुख कारी ।।

रचनाकार - श्री दुर्गाशंकर इजारदार
सारंगढ़, छत्तीसगढ़