श्री मनीराम साहू के दोहा

श्री मनीराम साहू के दोहा

भउजी के जी रंधनी, अड़बड़ मन ला भाय।
चिक्कन चाँदन हे दिखत,चुल्हा हवय लिपाय।।

माँजे धोये हे रखे,थारी संग गिलास।
बटकी माली तीर मा,जम्मो हा फुलकाँस।।

करछुल झारा अउ डुवा,हे चक बाँगा स्टील।
जम्मो माढ़े पाट मा,कोन्टा लोढ़ा सील।।

गंज कराही तोपना, पयनाहा टंगाय।
हँउला मा पानी भरे,बटलोही तोपाय।।

शौचालय बनवाव जी,लोटा धर झन जाव।
चारों कोती स्वच्छता,दिखही जम्मो गाँव।।

लोटा मा पानी रखय,पीढ़ा मा बइठाय।
छत्तीसगढ़िन हाँस के, पहुना ला परघाय।।

लोटा मा पानी धरे,बाट देखहूँ तोर।
मोला तीजा लेगबे,आबे भाई मोर।।

लोटा टठिया बेच के,लइका जेन पढ़ाय।
उही ददा-दाई हरय,भीख माँग अब खाय।।

संसो झन कर थोरको,रखहूँ दीदी ध्यान।
रहिबे जोर-जँगार के, आहूँ आठे मान।।

राँपा गैंती धर चलय,मुँधराहा ले खार।
आवय खन्ती कोड़ के,होवय जब मुँधियार।।

कका डीपरा ला खनय,देवय झउहाँ जोर।
काकी लेगय बोह के,रचय मेड़ के कोर।।

अक्ती हरय किसान के,शुरु दिन खेती साल।
कोल्लर गाड़ी बाँध गा,देबो खातू पाल।।

आरी पुटहा देख ले,बरही जुड़ा लान।
जोेता ला तैं ला लगा,पिँजरी देख बँधान।।

राँपा झउहाँ ला घलो, गाड़ी मा चल जोर।
खाही बइला तान के, भूँसा ला तैं बोर।।

रचनाकार - मनीराम साहू "मितान"
कचलोन(सिमगा)
छत्तीसगढ़