रोला छंद-कुलदीप सिन्हा

रोला छंद-कुलदीप सिन्हा

नइ हे जी तँय जान, काल के कोनो मालिक।
पढ़ के पा गे ज्ञान, बड़े ले बड़े विज्ञानिक।।
नाचत हे दिन रात, मूड़ मा वोहर सबके।
पावय नइ जी पार, गला ला कब वो चपके।।1।।

रावण के अभिमान, चूर गा होगे जानो।
नइ बाँचिस परिवार, भले कोनो झन मानो।
कतको रहिस ग ज्ञान, काम एको नइ आइस।
करनी के फल जान, देख वोहर गा पाइस।।2।।

भज ले जी तँय राम, पार गा भव हे होना।
धर के अब पतवार, नाव ला खुद हे खोना।।
ये जग ला जी जान, मया के गहरा सागर।
करथे जी सब बात, एक मन के गा आगर।।3।।

सब ला जी भगवान, देत हे दाना पानी।
चांटी हाथी मान, हवय गा एक कहानी।।
रहय न कोनो भूख, सोंच के देथे खाना।
करय नहीं जी भेद, समझ नइ पाय जमाना।।4।।

करबे सब ले प्रेम, घृणा ला दुरिहा कर के।
मिलही तुमला जान, प्रेम गा दुनिया भर के।
मनवा तेहा चेत, छोड़ दे दुनियादारी।
तन भीतर भगवान, करव जी वोखर चारी।।5।।

छंदकार
कुलदीप सिन्हा "दीप"
ग्राम -- कुकरेल ( सलोनी )
जिला ---- धमतरी ( छ. ग. )