रोला छंद-श्री सुखदेव सिंह'अहिलेश्वर'

रोला छंद-श्री सुखदेव सिंह'अहिलेश्वर'

------नहकइया हे जेठ--------

नहकइया हे जेठ, फेर आही पारी मा।
आवत दिखे असाढ़, गाँव के तइयारी मा।
भेंटे बर चउमास, सजत हे खपरा छानी।
पावत हावय आँच, चेरहा आमा चानी।

काँद-दुबी खपटाय , बिनागे झुनकी पैरी।
बइला मन बर नून, बदलही भउजी भैरी।
काँटा गय लेसाय, बिछागय खातू-माटी।
तरिया गय नेवार, अगोरय खटिया पाटी।

दरा-फुना गे दार, धरागे लकड़ी छेना।
हफ्ता दस दिन बाद,उघरही चना चबेना।
होही लगिन बिहाव, जेठ बेटा बेटी के।
सगा पहुँच नइ पाँय, भले एती-तेती के।

घुरुवा मन ला देख, हँसत हें हो के रीता।
लगथे दे के ध्यान, सुने हें भगवत गीता।
कटगे बँबरी थाँघ, ढेखरा बनके धँसही।
चढ़ के सेमी नार, छछल के खुलखुल हँसही।

पैरावट लिस ओंढ़, चदरिया ला जलरोधी।
धरे कलारी हाथ, तिरे बर अब झन ओधी।
छाता पनही टार्च, दुकानन मा टंगागे।
उन्नत संकर बीज, हँसत मुस्कावत आ गे।

रचना-सुखदेव सिंह'अहिलेश्वर'
गोरखपुर कबीरधाम छत्तीसगढ़