मतदाता स्थापना दिवस विशेष

 मतदाता जागरूकता दिवस विशेष

दोहा मुक्तक छंद -श्रीमती आशा आजाद

जागौ मनखे देश के,करौ अपन मतदान,
भारत देश विकास बर,धरौ सबो झन ज्ञान,
सुग्घर जुरमिल सोच के,डालौ अपने वोट,
नेता मिलही नेक जब,तभे बाढ़ही सान।

लोभ मोह ला छोड़के,सत के रद्दा जाव,
जनहित मा नित काज हो,मन ले लोभ भगाव,
सुग्घर नेता ला चुनौ,करदौ देश विकास,
पइसा माँगय बोकरा,उनला आज जगाव।

मतदाता सच्चा रहय,जानय वोट अधार,
नेता चुन के लाव जी,जेन करय उद्दार,
दीन दुखी के काज ला,समझे अपने धर्म,
भूख प्यास जम्मो मिटे,इही वोट के सार।

सत्ता के नित लोभ मा,गलत करे सब काम,
झूठ लबारी गोठ ले,नेता पावै नाम,
चेत धरौ मनखे सबो,मिले हवे अधिकार,
आशा मीता शारदा,अरुण राम अउ श्याम।

छंदकार -श्रीमती आशा आजाद
पता - मानिकपुर कोरबा छत्तीसगढ़

💐💐💐💐💐💐💐💐💐💐💐💐💐💐

अरसात सवैया -श्रीमती आशा आजाद

बोट करौ सब ध्यान धरौ सब कीमत जानव चेत लगाव जी।
राज बने सबले बढ़िया अइसे मतदान सबो कर आव जी।
लोभ कभो झन राखव जी धमकाय कभू झन देख डराव जी।
वोट करौ अधिकार मिले सब डालव ये मँय ध्यान धराव जी।

छंदकार - श्रीमती आशा आजाद
पता -मानिकपुर कोरबा छत्तीसगढ़

💐💐💐💐💐💐💐💐💐💐💐💐💐💐

चौपाई छंद-डॉ तुलेश्वरी धुरंधर

अब चुनाव हा आगे संगी।बात चलत हे अड़बड़ जंगी।।
बोलय सबझन अड़बड़ नारा।शोर मचावै पारा पारा।।
रोज चुरत हे  बकरा कुकरा ।।बाँटत  हे सब घर मा लुगरा।
दारू के पेटी लानत हें।लइका बुढ़हा सब जानत हेँ।।
अपन वोट के तुम अधिकारी।एक  वोट चुनई  मा भारी।।
सोंच समझ के चुनहव भैया।नइते होही ताता  थइया।। 

डॉ तुलेश्वरी धुरंधर
ब्लोदाबजार