छन्न पकैया छंद-आशा आजाद

छंद पकैया छंद-श्रीमती आशा आजाद

छन्न पकैया छन्न पकैया, खेती सुग्घर करलौ।
नव हे वैज्ञानिक तकनीकी,ध्यान सबो झन धरलौ।।

छन्न पकैया छन्न पकैया,सुग्घर ध्यान लगावौ।
नव नव तकनीकी ले सबझन,उन्नत फसल उगावौ।।

छन्न पकैया छन्न पकैया,जैविक खाद ल डालौ।
लाभ कमावौ सबझन बढ़ियाँ,जिनगी सफल बनालौ।।

छन्न पकैया छन्न पकैया,मछली पालन करलौ।
नव तकनीकी ले पालन कर,रोजगार नव धरलौ।।

छन्न पकैया छन्न पकैया,उन्नत बीज ल लावौ।
खेती कर उत्तम बीजा ले,खुशहाली ला पावौ।।

छन्न पकैया छन्न पकैया,ड्रिप विधि ला अपनावौ।
नव साधन ले करौ सिंचाई,उन्नत फसल ल पावौ।।

छन्न पकैया छन्न पकैया,लाभ योजना देही।
खेती हे जिनगी किसान के,ब्याज बैंक हा कम लेही।।

छन्न पकैया छन्न पकैया,सबले बढ़के खेती।
आशा सुग्घर बात बतावै,निक खेती के सेती।।

छंदकार-श्रीमती आशा आजाद
पता-मानिकपुर कोरबा छत्तीसगढ़