सरसी छंद (सावित्री बाई फुले जी ल समर्पित)-श्रीमती आशा आजाद

सरसी छंद गीत-श्रीमती आशा आजाद

मान हमल सावित्रीबाई,याद रखौ ये बात।
प्रथम शिक्षिका ओ कहलाइन,सुग्घर दिन सौगात।।

पति ज्योतिबा फुले हा राहिन,सुग्घर गुण के खान,
अपन ज्ञान जग मा बगराके,करिन देश उत्थान,
नेक ज्ञान ला सुग्घर बगराइन,दिन देखिन ना रात,
मान हमर सावित्रीबाई,याद रखौ ये बात।

दलित जाति ला शिक्षित करना,इही रहिस बस कर्म,
महिला मन ला ज्ञान बाँटना,समझिस अपने धर्म,
कष्ट अबड़ झेलिस जी सुनलौ,अउ झेलिस आघात,
मान हमर सावित्रीबाई,याद रखौ ये बात।

अबड़ विरोधी मनखे राहिन,विपदा के बौछार,
हिम्मत ले ओ महानायिका,बनिस सत्य के सार,
वर्तमान मा अब्बड़ बढ़गे,शिक्षा के अनुपात,
मान हमर सावित्रीबाई,याद रखौ ये बात।

छंदकार-श्रीमती आशा आजाद
पता-मानिकपुर कोरबा छत्तीसगढ़