कज्जल छंद- *कहाँ गवाँगे मोर गाँव*
कहाँ गवाँगे मोर गाँव।
अमरइया बर नीम छाँव।
माते हावय काँव-काँव।
खोर-गली अउ ठाँव-ठाँव।।
भाई-भाई लड़त आज।
भूल गये हें सुमत काज।
आवत हे जी देख लाज।
दुख के रोजे गिरत गाज।।
बाँट डरिन घर खेत-खार।
संग ददा-दाई दुलार।
कोला-बारी के उजार।
होगे जम्मो तार-तार।।
सुन्ना हे चौपाल देख।
फुटहा होगे करम लेख।
गोठ मोर संगी सरेख।
होगे सब मीटियामेख।।
नशा करे लइका सियान।
रथें पड़े उन तो उतान।
आज मरे होगे बिहान।
देबो संगी चलौ ध्यान।।
पाँव गड़य झन कभू शूल।
चलौ खिलाबो सुमत फूल।
बैर भाव सब द्वेष भूल।
लेबो सुख झूलना झूल।।
✍🏻इंजी. गजानंद पात्रे "सत्यबोध"
बिलासपुर (छत्तीसगढ़)06/09/2026
No comments:
Post a Comment