सार छन्द गीत (हरेली)
नागर बख्खर कुदरी राँपा, घर-घर मा धोवाही।
बड़े बिहनिया पूजा होही, सबके मन मुस्काही।।
भोग लगाये खातिर संगी, चुरही गुर के चीला।
बहुते बँटही आज प्रसादी, खाहीं माई-पीला।।
कमियाँ मन घर छत्तीसगढ़ के, सुख के बादर छाही।
नागर बख्खर कुदरी राँपा, घर-घर मा धोवाही।।
बइला-भैंसा सबो मवेशी, के होही जी सेवा।
आज जड़ी बूटी के संगे, खाहीं रोट कलेवा।।
लीम-डार ला राउत सबके, घर मा खोंचे जाही।
नागर बख्खर कुदरी राँपा, घर-घर मा धोवाही।।
लइका मन के गेंड़ी बनही,रचरच रचरच बजही।
परब हरेली आये हावय, घर-अँगना हा सजही।।
गली-गली मा लग्गा लगही, नरियर हा फेंकाही
नागर बख्खर कुदरी राँपा, घर-घर मा धोवाही।।
परब हरेली धरके लाये, जन-जन मा खुशहाली।
चारो कोती छाये संगी, हरियाली-हरियाली।।
छत्तीसगढ़ के संस्कृति हा,दुनिया मा ममहाही।
नागर बख्खर कुदरी राँपा, घर-घर मा धोवाही।।
डी.पी.लहरे'मौज'
कवर्धा छत्तीसगढ़
No comments:
Post a Comment