विष्णुपद छन्द-विधान*

*विष्णुपद छन्द-विधान*

विधान  (१६-१०)

डाँड़ (पद) - २, ,चरन - ४  

तुकांत के नियम - दू-दू डाँड़ के आखिर मा माने सम-सम चरन मा, लघु-गुरु (1,2)

हर डाँड़ मा कुल मातरा – २६ , बिसम चरन मा मातरा – १६, सम चरन मा मातरा- १०

यति / बाधा – १६, १०  मात्रा मा

सम चरन  के आखिर मा (लघु, गुरु)

उदाहरण -

*जिनगी छिन भर के (विष्णु पद छन्द )*

मोर - मोर  के  रटन  लगाथस, आये  का धर के

राम - नाम जप मया बाँट ले, जिनगी छिन भर के।

फाँदा किसिम - किसिम के फेंकै, माया हे दुनिया

कोन्हों   नहीं  उबारन  पावै , बैगा  ना   गुनिया ।

मोह  छोड़  जेवर - जाँता के, धन - दौलत घर के

दुन्नों  हाथ  रही  खाली  जब , जाबे  तँय मर के।

वइसन  फल  मिलथे दुनिया-मा , करम रथे जइसे

धरम-करम बिन दया-मया बिन, मुक्ति मिलै कइसे।

बगरा  दे  अंजोर  जगत - मा, दिया असन बर के

सदा  निखरथे  रंग  सोन  के, आगी - मा  जर के।

*गुरुदेव अरुण कुमार निगम*

*नोट* -

शंकर छन्द अउ विष्णुपद छन्द मा दू पद होथे। दुनों पद आपस मा तुकान्त होथे। विषम चरण मा 16 अउ सम चरण मा 10 मात्रा होथे।

*दुन्नों छन्द मा एक अंतर है* कि,

शंकर छन्द के अंत गुरु, लघु (2,1)

से होथे। अउ

विष्णुपद छन्द के अंत लघु, गुरु (1,2)

से होथे।

*अरुण कुमार निगम*