बरवै छंद- विधान*

 *बरवै छंद- विधान*

*बरवै छंद (१२ + ७)*

डाँड़ (पद) - २, ,चरन - ४  

तुकांत के नियम - दू-दू डाँड़ के आखिर मा माने सम-सम चरन मा, गुरु-लघु (२,१)

हर डाँड़ मा कुल मातरा – १९ , बिसम चरन मा मातरा – १२, सम चरन मा मातरा- ७

यति / बाधा – १२, ७ मातरा मा

खास- बिसम चरन  के आखिर मा १ बड़कू या २ नान्हें , सम चरन  के आखिर मा बड़कू,नान्हें (२,१).

*उदाहरण*

*बेटी (बरवै छंद)*

बेटी बिन सुन्ना हे, घर परिवार

बेटी बनके लछमी , ले अउतार।।

घर के किस्मत देथे, इही सँवार

बिन बेटी के कइसे, परब-तिहार।।

बेटी के किलकारी , काटय पाप

मंतर जइसे गुरतुर, मंगल जाप ।।

तुलसी के बिरवा कस, बेटी आय

जेखर आँगन खेले , वो हरसाय ।।

सुनो गुनो का कहिथें, सबो सियान

महादान कहिलाथे, कन्या-दान ।।

अरे कसाई झन कर, अतियाचार

बेटी के पूजा कर, जनम सुधार।।

*अरुण कुमार निगम*