कुकुभ छन्द- विधान

*कुकुभ छन्द- विधान

 *(१६-१४ यति / अंत मा दो गुरु)*

डाँड़ (पद) - २, ,चरन - ४

तुकांत के नियम - दू-दू डाँड़ मा (सम-सम चरन मा) आखिर मा २ बड़कू(गुरु)

हर डाँड़ मा कुल मातरा – ३० ,

बिसम चरन मा मातरा – १६  , सम चरन मा मातरा- १४  मातरा मा  

यति / बाधा – १६, १४ मातरा मा

*उदाहरण*

*बिनती (कुकुभ)*

बेटा दुलरू बनिस बिदेसी, जब पढ़-लिख डारिस ज्यादा

रद्दा   देखत-देखत  मरगिन , दुलरू के  दादी - दादा ।।

सपनावत होही  जब वो हर,  तब कइसे  लागत होही

कभू  ददा-दाई  के  सुरता , का ओला  आवत होही ।।

कोरा-मा दाई के खेलिस , बाढ़िस बइठ  मोर काँधा

काँधा देवइया के सुरता मा फूटत  हे  मन-बाँधा ।।

नान्हेंपन के खई-खजानी , आमा डार  झुलै झूला

कोन जनी  सुरता होही का , हमर मयारू दुलरू ला ।।

गोबर लीपे  अँगना - खोली , तुलसी के पावन चौंरा

छानी-मा  फुदकत  गौरैया , बखरी-मा  गावत भौंरा ।।

छानी ऊपर  कोंहड़ा-रखिया , बारी - मा झूलत खीरा

हमर मुहाटी मया - दया ला, देख नहीं खुसरिस पीरा ।।

ऊसर मूसर  जाँता जतरी , ढेंकी  माढ़य  परछी मा

महूँ चलाहूँ ढेंकी कहिके  , धान लाय वो  चुरकी मा ।।

चुरपुर अम्मट लागय तबले, चुचुर चुचुर चुचुरै लाटा

छोड़ खिलौना  डब्बा - डब्बी अउ खेलै लकड़ी-फाटा ।।

गाँव  मुहल्ला के  लइका  सँग, खेलै वो धुर्रा-माटी

गिल्ली-डंडा  छुवा-छुवौवल ,  रेस-टीप   भौंरा-बाँटी ।।

नान-नान कतको ठन सुरता , झूलत हे आँखी-आँखी

उड़के भेंट करी आ जातेंव ,  मोर कहूँ होतिस पाँखी ।।

ना कोन्हों संदेसा आइस   ,  ना कोन्हों चिठिया पाती

जीयत जागत मा आ जातिस, हमर जुडा जातिस छाती ।।

पाँच  बछर के  बेर  ढरक गे , लगे  अगोरा जिवलेवा

कभू हमर  बिनती  सुन लेही, करत हवन ठाकुर सेवा ।।

*अरुण कुमार निगम*