राम जनम - बोधन राम निषादराज
(लावणी छंद)
~~~~~~~~~~~~~~~~~~
तिथि नवमी चैती के महिना,
अवध नगर हर्षावत हे।
राजा दशरथ अउ कौशिल्या,
जम्मों सुख ला पावत हे।।
जीव जन्तु सब खुशी मनावै,
बनवासी के डेरा मा।
पुरवइया सुग्घर निक लागै,
राम जनम शुभ बेरा मा।।
सरयू के पबरित जल छलकत,
भाग अपन सँहरावत हे।
तिथि नवमी चैती....................
दाई कौशिल्या के गोदी,
खेलत अवध बिहारी हे।
कैकेयी के भरत शत्रुघन,
पारत सब किलकारी हे।।
लखन सुमित्रा आँखी तारा,
सबके मन ला भावत हे।।
तिथि नवमी चैती..................
जोगी बनके भोले बाबा,
अँगना द्वार पधारे हे।
आस लगाए बजरंगी हा,
रूप बेंदरा धारे हे।।
दर्शन खातिर नर अउ नारी,
फूल सबो बरसावत हे।
तिथि नवमी चैती....................
~~~~~~~~~~~~~~~~~~~~
रचनाकार:-
बोधन राम निषादराज"विनायक"
सहसपुर लोहारा,जिला-कबीरधाम(छ.ग.)
No comments:
Post a Comment